Нашақорлық – қазіргі қоғамның қасіреті әрі ең өзекті мәселелердің бірі. Бұл – болашағымызға балта шабатын қауіпті індет. Қазіргі таңда мұндай кеселмен қоғам болып күресу, жастар мен балалар арасында салауатты өмір салтын насихаттау – аса маңызды міндеттердің бірі болып отыр.
26 маусым – Халықаралық нашақорлықпен және есірткі бизнесімен күрес күні. Осыған орай Жетісай аудандық “Жастар ресурстық орталығы” КММ-нің жылдық жоспарына сәйкес «Нашақорлыққа жол жоқ!» тақырыбында профилактикалық жиын өтті.
Іс-шара Ғани Мұратбаев атындағы Жетісай гуманитарлық-техникалық колледжінде ұйымдастырылды. Жиынның негізгі мақсаты – жастарды нашақорлықтың зияны туралы хабардар ету, олардың бойында салауатты өмір салтына деген ынтаны арттыру және есірткіге қарсы күрестің алдын алу жолдарын талқылау.
Кездесуге Жетісай ауданы полиция бөлімінің ЮПТЖ қызметкері Н. Носирбаев, Жетісай АПБ ЖПҚ ОТЗЗҚКт аға инспекторы, полиция аға лейтенанты Айтуған Рүстемұлы Шәріпбаев, полиция лейтенанты Ерсүндет Әбдіразақ, Жетісай аудандық орталық ауруханасы басшысының орынбасарының міндетін атқарушы Сманова Гаухар Нұрмаханқызы, “Жастар ресурстық орталығы” КММ-нің инспекторы Зүлфия Жолдыбаева, колледж психологы және білім алушы студенттер қатысты.
Алғашқы сөзді Жастар ресурстық орталығының инспекторы Зүлфия Нұрғалиқызы алып, нашақорлықтың – әсіресе жастар арасындағы таралуы – тек Қазақстан үшін ғана емес, бүкіл әлем үшін алаңдатарлық мәселе екенін атап өтті. Ол есірткінің жастардың білім алуына, еңбекке қабілеттілігіне кері әсер етіп, уақыт өте келе тәуелділікке әкелетінін түсіндірді. Сонымен қатар, өркениетті ел болуға кедергі келтіретін мұндай жағымсыз әдеттерден қоғам болып арылуға шақырды.
Іс-шара барысында құзырлы орган өкілдері де сөз алып, есірткі қолдану мен таратуға қатысты қылмыстық жауапкершілік жайында кең көлемде түсіндіру жұмыстарын жүргізді. Жасөспірімдерге есірткі қылмысының салдары мен заң алдындағы жауапкершілік туралы нақты ақпарат беріліп, салауатты өмір салтын ұстануға үндеу айтылды.
Жиын соңында колледж студенттері өздерін қызықтырған сауалдарын қойып, мамандар тарапынан тұщымды жауаптар алды.
