«Республика күні – елдің мемлекет құру жолындағы тарихи қадамының символы болуы керек. Әрине, Тәуелсіздік күнінің бастапқы мәні сақталады. Бұл күн мемлекеттік мереке болып қала береді. Бірақ, тәуелсіздік алуға зор үлес қосқан ұлттық батырларымызға тағзым күні ретінде атап өтілуі керек» деген Мемлекет басшысы Қасым-Жомарт Тоқаевтың бастамасымен «25 қазан – Республика күні» мерекесі болып бекітілді.
Мемлекеттің қалыптасу тарихы ұлықталып, өткеннің өнегесін өскелең ұрпаққа насихаттайтын айшықты мерекені аудан жастарына кеңінен насихаттау мақсатында Жетісай қаласында «Қажымұқан Мұңайтпасов» атындағы орталық стадионда аудандық мәдениет, тілдерді дамыту, дене шынықтыру және спорт бөлімінің ұйымдастыруымен «Біз экстремизм мен терроризмге қарсымыз!» ұранымен ауданның ашық біріншілігі болып өтті.
«25 қазан – Республика күні» мерекесі аясында 2009 – 2010 жылы туылған жасөспірімдер арасында кіші футболдан өткен турнирдің ашылу салтанатына Жетісай ауданы әкімінің орынбасары Серік Пірімбеков пен аудандық мәдениет, тілдерді дамыту, дене шынықтыру және спорт бөлімінің басшысы Еркебұлан Сейдалиев, «Жетісай спорт клубы» КММ директоры Таласхан Битуреев қатысып, жас спортшыларды мерекемен құттықтады. Жасыл алаңда сәттілік тіледі.
Сарыағаш, Келес, Ордабасы, Түлкібас, Төлеби және Жетісай аудандарымен қатар Түркістан қаласынан барлығы 12 командада 216 спортшы өзара мықтыны анықтады.
Тартысты өткен ашық біріншіліктің нәтижесі бойынша жүлделі ІІІ орынды Төле би ауданының командасы иеленсе, ІІ орынды Жетісай, І орынды Сарыағаш ауданының құрама командалары қанжығаларына байлады.
Жарыс қорытындысы бойынша жеңімпаз командалар ұйымдастырушылардың дипломдарымен, медальдарымен және арнайы кубоктарымен марапатталды.
