Жетісай ауданы, Қазыбек би ауылдық округіндегі «Рәміздер» алаңында 25 қазан – Республика күніне арналған Мемлекеттік туды көтеру рәсімі өтті. Алдымен Әнұран шырқалып, Көк байрақ желбіреді. Салтанатты жиынға Жетісай ауданының әкімі Серік Үсенұлы, ел ағалары, ардагерлер мен жастар, аудан тұрғындары қатысты.
Мерекелік іс-шарада концерттік бағдарлама ұсынылып, отаншылдықты дәріптейтін әндер шырқалды. Іс-шара «Көк тудың желбірегені» әнімен түйінделіп, жетісайлықтар бір-бірін мерекемен құттықтады.
Былтырдан бастап Республика күніне ұлттық мереке мәртебесі қайтарылды. Бұл – тәуелсіз еліміз үшін маңызды шешімдердің бірі. Республика күні – қазақ халқының мемлекет құру жолындағы тарихи қадамының символы. Бұл декларация Қазақстанның болашақ тәуелсіздігінің іргетасы болды. Декларация арқылы Қазақстанның жеке территориясы, азаматтығы, мемлекеттік бюджеті, халықаралық қатынастардағы дербестігі, саяси жолы бекітілді. Сондықтан да Респубика күнін елдің еңсесін көтеріп, отаншылдықты дәріптейтін бастамалармен атап өту – маңызды. Мемлекеттік ту – елдіктің белгісі. Азаттықтың айбары. Мемлекеттік рәміздерді құрметтеу – отаншылдық. Былтырдан бері Мемлекет басшысы Қасым-Жомарт Тоқаевтың бастамасымен еліміздің барлық өңірінде ту көтеру рәсімі өтіп келеді.
Биыл да Жетісай жұртшылығы маңызды мерекені жоғары деңгейде атап өтіп, мемлекеттік рәміздер дәріптелді.
Сонымен бірге Мамытов Серік Үсенұлы Жетісай ауданының әкімі аудан тұрғындарын мерекемен құттықтады:
«Құрметті Отандастар! Баршаңызды 25 қазан – Республика күні мерекесімен шын жүректен құттықтаймын!
Ата-бабамыздың сан ғасыр бойы аңсаған асқақ арманы мен ақжарма тілегі орындалып, жарқын жасампаздық пен үкілі үміті үстем болып, егемен еліміздің еркін дамуына айқара жол ашқан айтулы мереке бәріміз үшін қасиетті де қастерлі.
Ұлттың, тілдің, дәстүрдің, салт-сананың мызғымас тірегі, күші, алтын діңгегі, халықтың бақ жұлдызы бола білген 25 қазан – еліміздің ҚАЗАҚСТАН деген атпен бүкіл әлемге алғаш қадам басқан күні.
Сол сәттен бастап Қазақстан әлем сахнасында мақтанарлықтай беделге ие елге айналды. Жас мемлекетіміз осындай аз ғана уақыттың ішінде көптеген ірі экономикалық, саяси және әлеуметтік жетістіктерге қол жеткізді. Еліміздің аяғынан нық тұруы, ұлттық қауіпсіздікті қамтамасыз етуі және экономикамыздың жедел қарқынмен дамуы – қазіргі таңда негізгі стратегиялық бағыттар. Бүгінгі Қазақстан – тек өзі орналасқан аймақта ғана емес, бүкіләлемдік проблемаларды талқылауда және шешуде ықпалды рөл атқаратын ел болып танылды.
Ұлттық қасиетіміз бен Ұлттық құндылықтарымызды ұлықтап, Ұлттық намысымызды оятқан, әлемге қазақты азаттық сүйгіш, рухы биік, намысы берік халық ретінде мойындатқан Республикамыздың биіктерді бағындыруына барлық адамдар сүбелі үлес қосып келеді. Ұрпақтарының ырысы ортаймасын, намысы тапталмасын деп көксеген ата-бабамыздың арманы орындалған осы шақта баршаңызға бақыт, байлық, береке тілеймін! Еліміздің ертеңі жолындағы еңбегіміз жана берсін!
Көк байрағы желбіреген, бүгінгідей абыройлы да айбынды, беделді де берекелі, ынтымағы мен бірлігі жарасқан еліміздің болашағы баянды болғай!», делінген құттықтауда.
