Бүгін “AMANAT” партиясының Жетісай аудандық филиалы және “Жастар ресурстық орталығы” КММ-нің ұйымдастыруымен бастауыш партия ұйымдарының арасында ерекше форматтағы ауқымды интеллектуалды сайыс – “AMANAT AQYLMAN” өтті. Бұл білім додасы партияның зияткерлік әлеуетін арттыру, ішкі ұйымшылдықты нығайту, саяси белсенділік пен мәдени танымды көтеру мақсатында ұйымдастырылды.
Іс-шараға “AMANAT” партиясы Жетісай аудандық филиалының төрағасы Асқар Қайназаров, “Жастар рухы” жастар қанатының Түркістан облыстық филиалының төрағасы Жансерік Бауыржанұлы, “Тұран” мектеп-гимназиясының бейіндік жұмыстар жөніндегі орынбасары Табиғат Маратұлы, жеке кәсіпкер Самат Амангелдіұлы, сондай-ақ бастауыш партия ұйымдарының мүшелері мен филиал қызметкерлері қатысты.
Сайысқа аудан аумағындағы бастауыш партия ұйымдарынан 8 команда іріктеліп қатысты. Әр команда өз ұйымының атынан қатысып, намысын қорғады. Қатысушылар тарих, мәдениет, саясат, заманауи Қазақстан, ұлттық құндылықтар мен партия жұмысына қатысты тақырыптарды қамтыған сан алуан сұрақтарға жауап берді.
Жарыс барысында командалар тек білімдерімен ғана емес, өзара қолдаушылықтары, шапшаң ойлау қабілеттері мен бір-бірін тыңдай білу мәдениетімен де ерекшеленді. Бұл – нағыз командалық рух пен бірліктің көрінісі болды. Залдағы көрермендер де үлкен қызығушылықпен тамашалап, өз командаларын қолдады.
Сайыс 4 кезеңнен тұрды. Әр кезеңде сұрақтар біртіндеп күрделене түсті. Қатысушылар тарихи деректер мен нақты дәйектерді келтіріп, өз білімдерінің тереңдігін көрсете білді. Сонымен қатар, сайысқа әділ төрелік еткен қазылар алқасы да жоғары кәсібилікпен жұмыс атқарды.
Сайыс қорытындысы бойынша үздік нәтиже көрсеткен командалар келесідей марапатталды:
Бірінші орын – 50 000 теңге: “Ақыл арнасы” командасы (Қарақай бастауыш партия ұйымы)
Екінші орын – 30 000 теңге: “IQ Жетісай” командасы (Мырзашөл және Береке бастауыш партия ұйымдары)
Үшінші орын – 20 000 теңге: “Тапқыр team” командасы (Қазыбек би және Жаңа ауыл бастауыш партия ұйымдары)
Қалған командалар да назардан тыс қалмады. Барлық қатысушыларға алғыс хаттар мен естелік сыйлықтар табысталды. Бұл – олардың белсенділігіне, білімге деген құштарлығына және “AMANAT” партиясының бастамаларына деген адалдығына берілген әділ баға.
Осындай форматтағы іс-шаралар партия жұмысына тың серпін береді. Олар бастауыш ұйымдар арасындағы байланысты нығайтып қана қоймай, мүшелердің өзара тәжірибе алмасуына, жеке дамуына және қоғамдық мәселелерге терең үңілуіне жол ашады.
Сайыстан ерекше әсер мен жарқын сәттер есте қалды. Іс-шара соңында қатысушылар мен ұйымдастырушылар естелік суретке түсіп, алдағы уақытта да осындай мазмұнды шаралардың жалғасуын тіледі.
Білім – баға жетпес байлық. Біз осы байлықты бағалайтын, ойлы да ұлтжанды азаматтарды тәрбиелеуге күш салып келеміз.
“AMANAT AQYLMAN” сайысы – соның жарқын дәлелі.
