Бүгін аудан әкімінің мәжіліс залында аудан прокуратурасының бастамасымен «Отбасындағы некенің бұзылуы, ұлттық құндылықтардың жоғалуы және борышкер тарапынан алименттің мерзімінде төленбеуі» тақырыбында мәжіліс-семинар өтті.
Мәжіліске құқық қорғау органдары (сот, прокуратура, полиция бөлімі, сот орындаушылары), қоғамдық ұйым жетекшілері, мемлекеттік мекеме басшылары, аудандық мәслихат депутаттары және БАҚ өкілдері қатысты.
Ата заңымыз Қазақстан Республикасының Конституциясының 27-бабына сәйкес неке мен отбасы, ана мен әке және бала мемлекеттің қорғауында болады. Балаларына қамқорлық жасау және оларды тәрбиелеу — ата-ананың етене құқығы әрі міндеті.
Жиын барысында – бірінші кезекте ерлі-зайыптылардың отбасын сақтап, некені бұзу жәйттерін алдын-алу болса, екінші кезекте кәмелетке толмаған балаларға ата-аналарының алимент берешегін уақытылы және толық төлеу міндетінің орындалуы бойынша жауапты мамандар баяндама жасады. Аталған тақырыпта ауданның зиялы қауым өкілдері баяндамаларды тыңдай келе өз ойларын білдіріп, ұсыныстарын айтты.
Аудан бойынша алимент өндіру 2021 жылдың қорытындысымен 1473 атқару құжаттары болып, оның 234 атқару құжаты аяқталған, ағымдағы жылға 1 239 атқару құжаттары орындалуда.
Осы орайда, аудан прокуратурасы аудан көлемінде алимент қарызын уақытылы және толық төлеу бойынша профилактикалық жұмыстарын жүргізіп, бұқаралық ақпарат құралдарында бейнероликтер, газеттерде мақалалар жариялануда.
Сонымен қатар, ауданда қоғамдық жерлерде билбордтар орнатылып, буклеттер таратылған.
Бүгінгі кездесу нәтижесінде тоқсанына бір рет өзекті мәселесі бар, яғни қай елді мекендерде некені бұзу жәйттері жиі орын алған және алимент мәселесі көп туындаған ауылдарға шығу арқылы өткізу жоспарланды.
