Бүгін аудан орталығы Темірланда 1 маусым — Халықаралық балаларды қорғау күніне орай Орталық саябақта думанды мерекелік іс-шара өтті.
Бүлдіршіндерді қуантуға арналған жиынға аудан әкімі Бағлан Батыршаев арнайы қатысып, сүйікті жас достарды мейрамымен құттықтады.
«Ұлтымызда «Елдің баласы бола алмаған ағасы да бола алмайды», — деген аталы сөз бар. Мәніне үңіліп, мазмұнын түсінер болсақ, халқымыз жас ұрпағынан үлкен үміт күткен. Сондықтан Мәңгілік еліміздің келешегі–балаларға, жасөспірімдерге үлкен буынның артар сенімі мол, күтер талабы таудай. Тұғыры биік еліміздің ертеңі бүгінгісінен де кемел болуы рухы асқақ, өресі биік, кішкентай да болса, үлкеннің назарын өзіне аударған білімді де талантты ұрпақ қолында. Біздің көңіліміздің гүлі, көзіміздің нұры, болашағымыз – Сіздерсіздер! Сондықтан да, Сіздер, сапалы білім алып, еліміздің дәулетті, жеріміздің сәулетті болуы үшін өз үлестеріңізді қосуларыңыз керек», деді аудан әкімі өз құттықтауында.
«Жас толқын» балалар мен жасөспірімдер театры саябақтағы шараның сәнін келтіріп, түрлі концерттік бағдарламалар ұйымдастырып, алаңға жиналған балаларға көтеріңкі көңіл-күй сыйлады.
Аудан әкімінің атынан іс-шараға жиналған бүлдіршіндерге балалықтың дәмі – балмұздақ үлестірілді.
Аудан басшысы Бағлан Дәнебекұлы жас бүлдіршіндердің балауса биін тамашалап, өнерлі жастардың шығармашылығына табыс, жазғы демалыстарының қызықты өтуіне тілектестігін айтты.
Осылайша жасөкіндер жыл сайын асыға күтетін жаздың алғашқы күніндегі айтулы мерекесі аудан көлемінде, барлық ауылдық округтерде есте қаларлықтай аталып өтті.
Ордабасы ауланы әкімдігінің баспасөз қызметі
