Бүгін аудан орталығындағы Ардагерлер саябағында 7 мамыр Отан қорғаушылар Күні мен Ұлы Жеңістің 77 жылдығына арналған «Ерлікке тағзым-елге мұра» атты тағылымы мол іс-шара өтті.
Мерекелік шара майданда қаза болған батырларымызды бір минуттік үнсіздікпен еске алып, гүл шоқтарын қоюмен басталды.
Іс-шарада аудан әкімінің орынбасары Азат Оралбаев пен аудандық Мәслихат хатшысы Қасымбай Әбдіхалық сөз алып, Отан Қорғаушылар мен майдан ардагерлерін құттықтады.
«Біздің халқымыздың және бүкіл ТМД халықтарының Ұлы Отан соғысында Жеңіп шығу үшін Ардагерлеріміздің қандай ұлы құрбандықтарға барғанын әркез есте сақтауға тиіспіз. Бұл тарих әркезде отбасында, мектепте, еңбек ұжымдарында әрбір жаңа буынды тынымсыз тәрбиелеудің тақырыбы болуы керек. Жеңістің ешқашан санадан өшпеуінің маңызы зор», – деді Азат Әбдіғалиұлы өз құттықтауында.
Мерекелік жиында Жеңіс лентасын кеуделеріне таққан ауданның ардагер ақсақалдары мен әжелері Мәдениет үйінің өнер ұжымы дайындаған концерттік бағдарламаны тамашалады.
Мерекеде Жеңістің 77 жылдығына орай ауданымыздың соғыс және тыл еңбеккерлеріне айырықша ілтипат көрсетіліп, сұрапыл соғыс туралы театрландырылған қойылым қойылып, рухты әндер орындалды.
Ордабасы ауданы әкімдігінің баспасөз қызметі
