Қасиетті жұма күні аудан орталығы Темірланда аудан әкімі Бағлан Батыршаев ауылдық округтер мен елді мекендерде ораза тұтқан тұрғындарға арнап ауызашар берді.
Ауданымызға қарасты 10 ауылдық округтен келген 150 шақты жамағатқа «Мирас» дәмханасында дастархан жайылып, ауданның бас имамы Айдос Керімбай бақилық болған барша отандастарымыздың рухына құран бағыштады.
«Қасиетті Рамазан айы халқымызды татулыққа шақыратынын бірлік айы. Айналамызға қайырымдылық танытып, жақсылық жасау Хақ дініміздің ең басты құндылығы. Сондықтан барша аудан тұрғындарын ізгілікке, жақсылық жасап жарысуға шақырамын. Айлардың сұлтаны – Ораза айындағы ұстаған оразаларыңыз қабыл, мұраттарыңыз асыл болсын!», деді аудан басшысы ауызашар рәсімінде.
Ауызашар кешінде бас имам көпшілікке арнап Рамазан айы туралы тағылымы мол ғибратты уағыз айтты.
Дәстүрлі дастархан басында ауызы дуалы ауыл қариялары сауабы мол игілікті шараны ұйымдастырған аудан басшысына алғысын білдірді.
Жиында мұхтарам жамағатқа арнап, ұлық дініміз бен салт-дәстүрімізді дәріптейтін әуезді әндер мен құлақ құрышын қандырған күйлер орындалды.
Ордабасы ауданы әкімдігінің баспасөз қызметі
