Бүгін Ордабасы ауданының орталығы Темірланда Құрманғазы атындағы Қазақ ұлттық халық аспаптары оркестрінің «Тұран даласына күй шашу» атты гастрольдік концерті өтті.
Аудандық Мәдениет үйінде өткен рухани-мәдени шараға аудан тұрғындарымен қатар аудан әкімі Бағлан Батыршаев, аудандық Мәслихат хатшысы Қасымбай Әбдіхалық қатысып, қазақ өнерінің қара шаңырағы ұсынған саф өнерді тамашалады.
Ән мен күй кешінде Қазақстанның еңбек сіңірген қайраткерлері – Жұбаныш Жексенұлы, Жеңіс Ысқақова, Мәдениет саласының үздігі – Айнұр Әбілдаева Ән падишасы — Шәмші Қалдаяқов бастаған сазгерлердің және халық әндерін орындап, жұртшылықтың ыстық ықыласына бөленді.
Оркестрдің бас дирижері – «Дарын» жастар сыйлығының лауреаты – Абылай Тілепберген мен дирижер, мәдениет қайраткері Жексен Айсын да оркестрді ұршықша иіріп, сырлы музыка әлеміне жетелей білді. Құрманғазы, Түркеш және өзге де ұлы күйшілердің күйлері, әлем музыканттарының классикалық туындылары орындалып, көрерменнің көңілі көтеріліп, рухы тасыды.
Татулық пен бірлік мекені – Ордабасы ауданының тұрғындары Құрманғазы оркестріне ризашылықтарын білдіріп, орындарынан тұрып, ұзақ қол шапалақтап, құрмет көрсетті.
Тағылымды мәдени шараның соңында аудан әкімі Бағлан Батыршаев сөз алып, алыстан ат арытып өңір тұрғындарына эстетикалық сезім сыйлаған өнер ұжымына аудан халқы атынан алғыс айтты.
Сондай-ақ, қарашаңырақ Құрманғазы атындағы Қазақ ұлттық халық аспаптары оркестрінің ұжымына арнайы Алғыс хат пен үш тілде жарық көрген күш атасы – Қажымұқан Мұңайтпасұлы туралы кітап және даңқты балуанның бейнесі бедерленген кілемше табыс етті.
Өз кезегінде оркестр басшылары осы мәдени шараның ауданда өтуіне қолдау көрсеткен аудандық Мәслихаттың хатшысы Қасымбай Жақанұлына ризашылығын білдірді.
Ордабасы ауданы әкімдігінің баспасөз қызметі
