Мемлекет басшысы Қасым-Жомарт Тоқаевтың Қазақстан халқына арнаған «Жаңа Қазақстан: жаңару мен жаңғыру жолы» Жолдауын негізге алып, ұлтымыздың алтын бесігі, тағылымды тарихымыздың куәсі, бүкіл қазақ елі қадір тұтатын қастерлі өлке жайлы тарихи-танымдық фильм түсіру мақсатында
«Мәртөбеден Ұлытауға» экспедициясы басталды.
Осыған орай Түркістан облыстық мәслихатының депутаты, «Айғақ» телеарнасының бас директоры Дулат Әбіш бастаған бір топ азамат жаңадан құрылған Ұлытау облысына жолға шықты.
Делегация құрамында елімізге белгілі археолог,тарихшылар мен өлкетанушылар, қаламы қарымды журналистер мен меценаттар бар.
Бүгін экспедиция мүшелерінің сапары Дала заңы қабылданған мәртебелі Мәртөбеден бастау алып, қазақ елінің қағбасы — Ордабасы тауында жалғасын тапты.
Ұлтымыздың тегін құраған үш жүздің басы қосылған Ордабасы тауында өткен тағылымды шараға ауданымыздың ардагер ақсақалдары, зиялы қауым өкілдері, әкімдік өкілдері қатысты.
Рухани шара барысында көпті көрген ақсақалдар Ордабасы тауының тарихы туралы тағылымды сұхбат құрып, экспедицияның жұмысына сәттілік тіледі.
Елдігіміздің мәртебесін, бірлігіміздің берекесін айшықтаған аса қастерлі мекенде Дала парламентінің келелі жиындары өткенін айта кеткен жөн.
Ордабасы ауданы әкімдігінің баспасөз қызметі.
