Айтып отырғаным киелі Ордабасы тауы. Қазақтың үш жүзінің басын қосып, мәмілелесіп, еліміз бен жеріміздің сақталуына ұйытқы болған құтты мекен.
Өткен шаққа оралайықшы. Мұнда Қазақстан, Өзбекстан, Қырғызстан Президенттері бас қосып, Ордабасы тауының атағын әлемге тағы бір жаңғыртқан еді. Ту төбе мен үш бидің ескерткіштері орнатылды. Осылайша Ордабасы мемориалды қорығы республикалық статусқа ие болды.
Кезінде Ж.Түймебаев облыс әкімі болып тұрғанда осы киелі мекенде мектепті алтын медалға бітірушілердің жиынын өткізіп, түлектердің мерейін асырғаны да бар еді. Бұл тауға Оңтүстік өлкесіне жолы түскен қаламгерлер де жиі келеді.
Бірақ осы тарихи орынның қазіргі көрінісі көңілге қаяу түсіреді. Үш бидің ескерткіштері тозған. Ту төбе маңы да реңсіз. Абаттандыру жұмыстары да төмен. Жалпы Ордабасы қорығына жанашырлық танытатын азаматтар табылмай тұрғандай әсер етті.
Кемеңгер жазушы, марқұм Шерхан Мұртазаның мынадай сөздері еріксіз еске түседі. «Ордабасы ауданының шекарасына келгенде көліктен аяғымыз дірілдеп түсеміз. Сіздер, Оңтүстіктегілер, күнде жүргендіктен байқай бермейсіздер, бұл жерде елдіктің ұйытқысы болған ата-бабаларымыздың табанының іздері бар. Сондықтан бұл өңір қасиетті де құт орда. Осыны ұмытпаңыздар», — деген еді жарықтық.
Жуырда Ордабасы тауының басында тұрып: «Қайран Шерхан көке, біз сіздің аманатыңызды ақтай алмай жүрміз-ау, кешіріңізші» дедік. Амалсыздан.
Сондықтан Қазақстан республикасы мәдениет және спорт министрі Дәурен Абаев мырза мен облыс әкімшілігінің қызметкерлері қасиетті Ордабасы тауына келсе, біздің тау басындағы ойымыздың анықтығына көздері жетер еді-ау дейміз. Қиялданып. Сіз не дейсіз бұған, оқырман?!.
Ғалымжан ЗИЯБЕК,
Ордабасы аудандық мәслихаттың депутаты.
