Түркістан облысы Полиция департаментінің Есірткі қылмысына қарсы іс-қимыл басқармасының бастамасымен Түркістан станциясындағы Желілік полиция бөлімі, Облыстық психикалық денсаулық сақтау орталығы және Түркістан облысы қоғамдық даму басқармасы «Жастар ресурстық орталығы» КММ-нің ұйымдастыруымен Түркістан қаласында кең көлемді ақпараттық-насихаттау акциясы өткізілді.
Аталған іс-шара «Есірткіге қарсы насихат» және «Есірткі қылмысы үшін қылмыстық жауапкершілікті түсіндіру» тақырыптарын қамтыды.
Іс-шараның негізгі мақсаты – халық, әсіресе жастар арасында есірткі құралдарын тұтынудың зиянды салдарын түсіндіру, есірткі айналымына байланысты құқық бұзушылықтардың жолын кесу, осы әрекеттер үшін қарастырылған қылмыстық жауапкершілік туралы ақпарат беру, жастардың құқықтық сауаттылығын арттыру және есірткіге қарсы қоғамдық иммунитетті қалыптастыру болып табылады.
Ақпараттық акция Түркістан қаласындағы негізгі көлік инфрақұрылымы нысандарында – Халықаралық Хазрет Сұлтан әуежайында және Түркістан теміржол вокзалында өтті. Аталған орындардың таңдалуы – халық көп шоғырланатын аймақтарда мақсатты түсіндіру жұмыстарын тиімді жүргізуге мүмкіндік берді.
Іс-шара барысында құқық қорғау органдары мен сала мамандары азаматтармен ашық диалог форматында әңгімелер өткізіп, арнайы әзірленген ақпараттық материалдарды – буклеттер, жадынамалар және парақшалар таратты. Таратылған материалдарда Қазақстан Республикасының қолданыстағы заңнамасына сәйкес есірткі құралдарын заңсыз сақтау, тасымалдау және тарату әрекеттерінің құқықтық салдары кеңінен түсіндірілді.
Мұндай ақпараттық-профилактикалық іс-шаралар құқықтық мәдениетті қалыптастыруда, жастарды құқық бұзушылықтан сақтандыруда және салауатты өмір салтын насихаттауда маңызды рөл атқарады.
