Әйел заты кез-келген уақытта нәзіктік, сұлулық, махаббат, мейірімділік пен қамқорлықтың белгісі болып табылған. Бүгін түркістандық әйел-аналар мен қыз-келішектер «Әйел сұлу қашанда әдебімен» тақырыбында өткен шарада бас қосты. «Ұлы дала елі» орталығының төрінде журналист Мөлдір Нұрманмен ұйымдастырылған кездесудің басы кіреберіс дәлізге қаз-қатар қойылған ұлттық салт-дәстүрлерімізден сыр шертер жергілікті қолөнер шеберлерінің көрмесімен басталды.
Файеде әрбір шебердің туындыларымен жекелей танысып, ұлттық тағамдардан дәм татып, залға жайғасқандар Түркістан қалалық мәдениет үйі өнерпаздарының концерттік шарасына куә болды. Кештің басты кейіпкері – Мөлдір Нұрман сахна төріне шақырылып, Түркістан қаласы әкімінің орынбасары Ерлан Күзембаев пен Түркістан қалалық мәслихатының төрағасы Ғаппар Сәрсенбаев сөз алып, облыс көлемінде қолға алынған жобаның құндылығына ризалығын білдірді. Аудандарды ретімен аралай келе керуен көшін Түркістанға тіреген Мөлдір Нұрманға қонақжайлықтарын танытып, сый-құрметтерін ұсынды.
Жалпы ұлылардың ұлағаты, тағылымды өсиеттерінен ана – қоғамды қозғаушы күш, бірлік-тірлік негізі, ел бейнесін айқындайтын өмір айнасы, ел тұтқасы екендігін тереңірек ұғынамыз. Әйел-ананың бейнесі қандай болса, сол елдің бейнесі, салт-дәстүрі сонымен өлшенеді.
Ежелгі ана-әжелеріміз қазақтың ұлттық салт-дәстүрін берік ұстанған. Көлеңдеген шағи, шайы көйлектерін, қарапайым қатипа тірсек жең пешпетін киіп, жаңа жауған ақша қардай аппақ шұлауышын тартып, кестелі, оқалы кимешегін салынып, көксауырдан оюлаған, өкшесі ақ күмістен тіремелі көгала бас кебіс, былғарыдан мәсісін киетін. Өзінің аналық, әжелік сән-салтанатты ұнамды бейнесімен, көпке үлгі кейпімен жан біткенге мейірімді, жылы жүзімен ықыласы адамды өзіне баурап алатын.
«Ерін күткен әйелді ханым десе болады» дегендей үй иесі отағасының орны төрде. Астына екі қабаттап төсеген қалың жылы, ақ-қара киізден ойыстырып жасаған қарала сырмақтың үстінде малдас құрып қара да болса тағында отырған хан іспетті қастерлі, иығы көтеріңкі, ақ сақалы жайқалып, айбарлы ашаң жүзі жадырап ауыл-аймаққа, ағайын-туысқа әмірін жүргізіп отыратын отағасының аузынан шыққан лебізін қарт ана баяғы жар сыйлаған дағдысымен елпең қағып алып ұшып тұра келіп айналасына жеткізетін. Өзі отағасының қабағын бағып, тас шайдан түйіп-түйіп, самауырға салып қайнатқан шайына қойдың қою сүтінің кілегейін қосып, қаймақ қатып, қалампыр сарымайдың иісін бұрқыратып қою күрең шайды әзірлейді. Жаңа сүзген жылы-жұмсақ ақ ірімшіктен жапырақтап турап, қызылжарма құрттан жармалап, жаңа пісірген балқаймақтан – бәрінен шағын дөңгелек ағаш табағын толтырып шайтақтайдың үстіне, отағасының алдына қояды. Шарадағы балқаймақты аузына тосып, қызыл күрең шайды самауыр босағанша тапжылмай құйып отырады. Ана отағасының алдына бір ауыз көлденең тіл қатпай, ымының ығымен құрақ ұшып отырғанда ұл-қыздары, күйеубала-келіндері, ата-енесін өзінен-өзі одан сайын құрметтейді.
Шараның тізгінін алған модератор, журналист Ақмарал Ғаниқызы еркін форматта өткен сұқбат-кездесудің сауалдарын қойып, Мөлдір Нұрманмен бірге қоғамдағы әйелдер арасындағы өткір әрі өзекті мәселелер төңірегінде әңгіме өрбітті. Бүгінгі бала тәрбиесі, ата-ананың ролі, қыздардың әдебі жайында мардымды мысалдары мен пайымды пікірлерін жеткізген Мөлдір Нұрман аудиторияның сұрақтарын кеңінен қамтып өтті. Шараға қатысқан мектеп мұғалімдері мен орта арнаулы оқу орындарының студенттері тағылымды шарадан түйгеніміз мол деп, естелікке суретке түсіп тарасты.
