Арыс қаласында Түркістан облысы дін істері басқармасының «Руханият керуені Түркістан төрінде» жобасы аясында қала тұрғындарымен рухани кездесу өтті.
Кездесудің мақсаты жастардың тәрбиесіне мән бере отырып отбасылық құндылықтарды сақтау, отбасындағы әкенің рөлі, имандылық, үлкенге құрмет, дәстүрлі емес діни ағымдардан сақтану және дәстүрлі құндылықтарымызды дәріптеу, керағар ағымдар жайында хабардар ету.
Кездесуге республикаға танымал, дінтанушы, теолог Ерсін Әміре арнайы келді. Жиынды қала әкімінің орынбасары Алмаз Советұлы ашып, жүргізіп отырды.
Кездесу барысында ел бірлігі, ата-баба дәстүрі, қасиетті Ислам дінінің құндылықтары туралы әсерлі әңгіме өрбітіп, өмірінде кездескен әр түрлі жағдайларды мысал ете отырып, жастарымызға ұлағатты насихат жеткізді. Көрермендер өздерінің көкейде жүрген сұрақтарын қойып, тұшымды жауап алды. Іс-шараға қала тұрғындары, жастар, колледж студенттері мен оқытушылар, мектеп оқушылары қатысып, тағылымды ой мен мағыналы әңгімелерді тыңдап, рухани танымын кеңейтті.
Іс-шараны қала әкімінің орынбасары Алмаз Советұлы қорытындылап, қадірлі қонаққа қазақы дәстүр бойынша шапан жауып, құрметт көрсетті. Ұлттық құндылықтарды насихаттауға, имандылық пен адамгершілік қасиеттерді дәріптеуге арналған рухани жиында тағылымы мол әсерлі әңгімелер айтып, жастарға тағылымы мол кеңестерімен бөліскен қадірлі мейманға қала тұрғындарының атынан шынайы алғысын жеткізді.
