Ордабасы ауданының әкімі Азат Оралбаев Қараспан ауылының тұрғындарымен кездесті. Жиында әкім ауыл халқының табысын арттыру, тұрғындардың әл-ауқатын жақсартуға бағытталған «Ауыл аманаты» бағдарламасы аясында жүргізіліп отырған жұмыстарға тоқталды.
ҚР Президенті Қасым-Жомарт Тоқаев биылғы Жолдауында ауылдарды дамытуға назар аударуды тапсырған болатын. Бүгінде облысымызда аталмыш бағдарлама бойынша елді мекендерде түрлі жұмыстар атқарылып, жүзеге асырылуда. Мәселен, Қараспан ауылында 96 мүшесі бар «Зере-Агро» ауыл шаруашылығы өнеркәсіптік кешені жұмыс істейді. Аталған ауылда «Ырыс» МҚҰ-ға 13 адам құжат өткізген (құны 84,9 миллион теңге), оның 12-сі мақұлданған. Бірақ 15,6 миллион теңгенің
3 жобасы қаржыландырылды. Несие негізінен мал шаруашылығы саласы бойынша алынған. Ауыл округі бойынша кірістердің жылдық жоспары 64,9 миллион теңге болса, 8 айдың қорытындысымен округ бойынша жоспарланған бюджет кірістері 107 пайызға орындалған. Сонымен қатар, соңғы 7 айда ауылға 810 миллион теңгелік жеке инвестиция тартылған. Ауыл бюджетіне түскен бұл қаржылар ауылды дамытуға жұмсалмақ.
Сондай-ақ кездесу барысында шаруалар ағын су мен жайылымдық жер мәселесі туралы сөз қозғады. Мәселен, Қараспан ауылдық округіндегі 4852 гектар суармалы жерді ағын сумен қамтамасыз ететін 22 канал бар. Қараспан магистраль каналын күрделі жөндеуден өткізу үшін 2022-2024 жылдарға қаржы қаралған. Қазіргі таңда күрделі жөндеу жұмыстары басталып, 10 шақырымы бетондалып жатыр. Сонымен қатар, осы жылдың қазан-қараша айларында «Р-8-А, Р-10, Р-12, Р-14» каналының 11,5 шақырымына механикалық тазалау жүргізу жоспарланып отыр.
Мемлекет басшысының игерілмей жатқан жерді ортақ меншікке алу тапсырмасы бойынша аталған ауылда жүйелі жұмыстар бар. Ауыл округі бойынша жайылымдық жердің жалпы ауданы 18 368 гектарды құраса, оның ішінде 1 884 гектары елді мекендердің ортақ жайылымдық жері ретінде 2019-2022 жылдары бекітіліп берілген. Биыл мемлекет мұқтажы үшін мәжбүрлеп иеліктен шығару бойынша жалпы ауданы 1 529 гектар жайылымдық жерді аудандық қорға қайтарып, ортақ жайылымға бекітіп беру жоспарланған.
Сонымен қатар, жиында су мәселесі туралы айтылды. Мәселен, 14 елді мекеннің 7-еуі орталықтандырылған ауыз сумен қамтылса, «Таза су» МКК 5 елді мекенге (Көлтоған, Төреарық, Ақжол, Жаңатұрмыс, Ақпан), «Қажымұқан-Қараспан ТСЖ» өндірістік бекеті арқылы Батыр ата және Берген елді мекендеріне ауыз су таратумен айналысады.
Екі жыл бұрын 3 нысан, яғни 4 елді мекенге (Қараспан, Бейсен, Мақташы және Сары-арық) ауыз су жүйесінің құрылысы басталып, оның ішінде, Қараспан ауылын ауыз сумен қамтамасыз ету нысанының құрылысы аяқталып, пайдалануға берілді. Қазіргі таңда Бейсен-Мақташы ауылдарына су жеткізу бойынша құрылыс жүргізіліп, сығымдау жұмыстарымен бірге есептеуіш құралдары орнатылуда. Сондай-ақ, Сарыарық, Ақшуақ, М.Мәметова және Табиғат көшелеріне «Таза су» мекемесі арқылы ауыз су жүйесі пайдалануға берілді. Берген ауылындағы мектепке баратын жолға, Мақташы ауылындағы Мұратбаев, Жабаев, Әбдібеков, Өмешбаев, Исабеков, Адамбеков көшесіне, Бейсен ауылындағы Алтынсарин, Оңтаев, Қостөбе көшесі Қараспан ауылындағы Қонысов, Қ.Бекмұратов көшесі орташа жөндеуден өтіп, Қараспан ауылының Әл-Фараби, Ырыс көшелеріне тас төселді.
Аудан әкімінің мәліметінше, 8 елді мекенге (Батыр ата, Берген, Көлтоған, Төреарық, Қараспан, Бейсен, Мақташы және Ақжол) табиғи газ жүйесінің құрылысы жүргізіліп, жыл соңына дейін «көгілдір отынға» қосылмақ.
Ауылды абаттандыру бойынша Қараспан, Мәдениет, Сарыарық, Төреарық ауылдарына ойын алаңшасын орнату жоспарда бар. Сонымен бірге, денсаулық сақтау саласында бірқатар нысандардың құрылысы аяқталып, пайдалануға берілді. Айталық, «Ауыл – ел бесігі» бағдарламасы аясында Көлтоған елді мекенінде фельдшерлік-акушерлік пункт іске қосылса, Төреарық ауылында дәл осындай нысанның құрылысы жүргізіліп, жыл соңына дейін пайдалануға берілмек. Ал білім саласы бойынша Мақташы елді мекенінен 200 орынды мектепке қаржы қаралып, жыл соңына дейін пайдалануға беріледі деп жоспарлануда.
А. ПАЙЫСХАН.
