Түркістан обылыстық мәдениет және туризм басқармасының ұйымдастыруымен қала, ауданаралық мәдениет күндері аясында Жетісай ауданында Мақтаарал ауданының мәдени күндері өтті. Шараға Мақтаарал ауданы әкімінің орынбасары Алтын Ешанқұлова қатысып, жетісайлықтарға өз алғысын білдірді.
Мақтаарал ауданының Жетісай қаласындағы мәдени күндері «Мақтаарал» мәдениет үйінің жанынан құралған «Балдәурен» қуыршақ театрының қойылымымен басталды. Жетісай қаласының «Нұр-жібек» бөбекжай-балабақшасында сахналаған ертегі қойылымдар бүлдіршіндерге қуаныш сыйлады. Ал екінші күні Жетісай орталық алаңында және Жетісай аудандық мәдениет үйінде қолөнер бұйымдарының көрмесі, кітап көрмесі, ұлттық салт-дәстүрге, әдет-ғұрыпқа байланысты іс-шаралар өтті. Сонымен қатар Мақтаарал аудандық әжелер алқасының төрайымы Шахзада Құрбанбаеваның «Өмірім – өнеге» атты алғашқы кітабының тұсау кесері өтті.
Шара Жетісай орталық алаңында өткен Гала-концертпен қорытындыланды. Кеште «Ақ алтын» ұлт аспаптар ансамблі, «Мерей» вокалды аспаптар ансамблі және мақтааралдық өнерпаздар жетісайлықтарға мерекелік көңіл күй сыйлады.
