«Сырдария-Түркістан мемлекеттік өңірлік табиғи паркі» биылғы жылы өзінің құрылғанына он жыл толуын атап өткелі жатыр. Бұрынғы Шардара, Арыс, Отырар, Түркістан және Боралдай орман қорғау мекемелерінің 119 мың гектар жерінен құрылған бұл парк жергілікті маңызға ие ерекше қорғалатын табиғи аумақтар санатында.
Осы парктің Боралдай филиалының 6308 гектар учаскесі туристік және рекреациялық қызмет аймағына кіреді. Бұл аймақтың белгілі бір бөлігінде экологиялық соқпақтар, демалыс орындары орналасқан.
Жыл сайын көктем айларынан бастап жаз айларының соңына дейін филиалдың ерекше жерлерін көруге келетін азаматтар саны бірден болмаса да, біртіндеп артып келеді. Бірақ келушілер арасында экотуризм мәдениетін қалыптастыру көп еңбекті қажет етуде. Дегенмен, еңбектене отырып табиғатта саяхаттау, демалу мәдениетін қалыптастырамыз деген сеніміміз бар.
Біздегі басты мақсат – Қаратау мен Боралдай тауының әсем табиғатын елге паш ету. Келген туристер біздің табиғатымызды көріп, танысу арқылы өздеріне қуат алып, керемет көңіл күйге бөленсе, онда мақсатымыздың орындалғаны деп білеміз. Сол үшін біздің филиалдың қызметкерлері филиал аумағындағы өсімдіктер мен жануарлар дүниесін орман өрттерінен, сұғанақтардан, өзге де кері әсерлерден қорғау жұмыстарын тұрақты түрде жүргізеді. Сонымен бірге аумақтың санитарлық тазалығы басты назарда.
Филиалдың туристерге көрсететін керемет жерлері өте көп. Дегенмен, біздегі туризмді дамытудағы кедергі – жол мәселелері. Биылғы жылы Мәдениет және спорт министрлігінің бұйрығымен «Сырдария-Түркістан мемлекеттік өңірлік табиғи паркі» туристік орындар тізбесіне еніп отыр. Ендігі жерде жергілікті атқарушы билік тарапынан жол мәселелеріне де көңіл бөлініп, кезең-кезеңмен шешімін табады деген ойдамыз.
Жалпы алғанда Боралдай филиалы аумағының туризмді дамытудағы әлеуеті жоғары.
Б.ШЫНАРБЕКҰЛЫ,
«Сырдария-Түркістан МӨТП» КММ-і Боралдай филиалының туризм маманы.
