Президенттің кезекті Жолдауынан көңілге бірден қона кеткен мәселерге тоқталар болсам, ең алдымен ауыл-аймақты дамыту мақсатында қолға алынғалы отырған бастамалар ұнады. Оның ішінде жергілікті биліктің әлеуетін арттырып, өз проблемаларын өздері жедел шешетіндей бюджет қарастыру керек дегені бүгінгі таңдағы ең өзекті мәселелердің бірі еді.
Жалпы қоғам алға жылжу үшін оған қозғау салатын күш керек. Жолдау сол күштің рөлін атқарып, жаңа бағдарламаға жол ашып, болашаққа бағыт-бағдар береді. Тек оны тиімді пайдалану әркімнің іскерлік қарым-қатынас қабілетіне байланысты. Мемлекет басшысы мәселен, ұлттық бизнестің әлеуетін арттыру керек дегенді осымен бірнеше рет қайталады. Шын мәнінде де, бүгіінгі қоғам үшін бизнестің әлеуетін арттырудың маңызы зор. Оның қажеттілігін білеміз, бірақ соны қалай жүзеге асыру керек дегенге келгенде, тағы да аяғына жем түскен аттай кібіртектеп қаламыз. Себебі бұрынғы жүйеге әбден қалыптасып қалған ескі кадрлармен жаңа жүйе құру мүмкін емес. Президент кадр саясаты мәселесін де орынды қозғады. Міне, осы айтылған мәселелер қалай жүзеге асады екен деп қарап отырмай, оның ертерек іс жүзіне аса беруіне баршамыз бір кісідей атсалыссақ алынбайтын асу, бағындырмайтын белес болмайды. Сондай-ақ, бұл Жолдауды мақташылардың пайдасына шешілді десек болады.
Дарбаза – Мақтаарал темір жолын салу көптен бері айтылып жүрген мәселе еді. Президент Жолдауында бұл мәселеге де назар аударылды. Су ресурстары және ирригация министірлігін құру керек дегені де қолдануға тұрарлық. Өйткені, суды тіршілік көзі дейтін болсақ, соңғы кездері бұл мәселе күн тәртібінен түспей тұр. Тіршілік көзін тиімді пайдаланудың маңызы зор екенін ескерсек, мұны да орынды айтылды деп есептеуге болады. Мен өзім ауыл шаруашылығы маманы болғандықтан Жолдаудағы жаңалықтарды рет-ретімен саралап көрейін.
Бірінші, бізге келетін ағын су 3 мемлекеттен өтіп келетінін ескерсек жаңадан Су ресурстары және ирригация министірлігі ауадай қажет. Сусыз өнім де,өмір де жоқ. Тек көршілермен ұтылмайтын мәмілеге келіп, дипломатиялық келіссөздерді байыпты жүргізген жөн. Бұл саланың министірі бірінші кезекте дипломат болу керек. Ішкі жағдайды реттеп, сала мамандары арқылы каналдарды, арық-атыздарды, қатаң бақылауда ұстау керек.
Екінші, Дарбаза – Мақтаарал темір жолы. Түркістан облысының қиырдағы Мырзашөл аймағындағы «ақ алтынды» Мақтаарал ауданына темір жолдың баруы, тек қарым- қатынас үшін ғана емес, шекарада қалып қойған ауыл аймақтар үшін де, елімізді көкөніспен қамтамасыз етіп отырған аймақтар үшін де стратегиялық тұрғыдан өте маңызды. Әрі арзандау болар еді. Ойласып пішкен тон,келте болмаса керек.
Үшінші, отандық өнім өндірушілерді қолдау. Осы мәселемен 2000-шы жылдан бері айналысып келеміз. Неше түрлі қитұрқы әрекеттердің куәсіміз. Біріншіден, сатып алушылардың (магнаттардың) «берсең де бер бес теңге, бермесең де бер бес теңге» деген қылығы диқандарды қажытып бітті. Өнім өндірушілер өнімі піскен соң солардың айтқан бағасына өткізуге мәжбүр.
Егістігіңді суаратын ағын су өте қымбат. Амал жоқ, айтқан ақшасын төлеп аласың. Антимонополиядағылар «сен тимесең, мен тиме» дейді. Сонда диқандардың құқығын кім қорғайды? Енді Жолдаудағы «Отандық өнім өндірушілерді қолдау» бағдарламасын оқып, біздің де қуанатын күніміз туды деп қуанып отырмыз.
Т.ҚАНАЕВ.
«Құрмет» Орденінің иегері, «Ақорда» шаруа қожалығының төрағасы.
