Түркістан облыстық Ыбырай Алтынсарин атындағы балалар кітапханасының «Оқырман өрендер – келешек кемелдер» жобасының аясында өңір бойынша ең үздік деп танылған оқырмандар бенефис шоуы өтті.
Аталмыш бенефис шоуды ойы зерек, қиялы жүйрік, ой-өрісі кең, жан-жақты, білімді, орны өзінше бір бөлек Келес, Отырар аудандарының және Кентау қаласының үздік оқырмандарына арнадық. Кентау қаласынан келген «Ай-қаракөз» бишілер тобы және Әл-Фараби атындағы №14 мектеп-гимназиясының 4-сынып оқушысы Аппасова Ариана, Отырар ауданының Темір ауылы «Темір» жалпы орта мектебінің 7-сынып оқушылары Ибадулла Сымбат пен Елдарқызы Альбина және Келес ауданының О.Есімов атындағы жалпы орта білім беретін мектебінің 8-сынып оқушысы Тұрабек Ақнұр мен Ә.Молдағұлова атындағы №3 жалпы орта білім беретін мектебінің 4-сынып оқушысы Тоқтыбаев Нуриман бенефис шоудың жарқыраған жұлдыздары атанды.
Бенефис шоудың дәстүрі бойынша алғыр, зерек, ең бастысы кітапқа деген құштарлығы өте ерекше үздік оқырмандар нағыз өлең оқу шеберлігін көрсетті. Сонымен қатар шоу интеллектуалды ойынмен жалғасып, балалар ертегілер және қазақ жазушыларының өмірбаяны мен шығармашылығы бойынша білімдерін сынады. Ал мың бұралған «Ай-қаракөз» бишілер тобы өз өнерлерін ортаға салды.
Шоу осындай өнегелі өрендерді өсіріп, білім нәрімен сусындатып жатқан ұлағатты ұстаздар мен рухани азық беріп отырған кітапханашылардың, жетекшілердің тілегімен, жұлдызды оқырмандардың өнерін, білімін саралайтын сарапшылардың өз ойларымен жалғасып, соңында құрметпен кітапхана басшысының атынан алғыс хаттар табысталды.
