Созақ аудандық балалар мен жасөспірімдер спорт мектебінде аудан прокуратурасының ұйымдастыруымен 1966-1984 жылдар аралығындағы Қазақ ССР-ның прокуроры Өтеген Сейітұлының туылғанына 100 жыл толуына орай Созақ ауданының мекеме қызметкерлері арасында волейболдан жарыс ұйымдастырылды.
Спорттық сайыстың ашылуына аудан әкімі Мұхит Тұрысбеков арнайы қатысып, ұйымдастырылған шараның маңыздылығына тоқталып өтті. Сонымен қатар, аудан прокуроры Ержан Қожабеков Қазақ ССР-ның прокуроры Өтеген Сейітұлының прокуратура саласындағы еңбектері мен жетістіктеріне тоқталып, жарысқа қатысушы командаларға сәттілік тіледі.
Сайысқа аудандық мекеме қызметкерлерінен құралған 8 команда қатысып, өзара бақ сынасты. Жарыс қорытындысы бойынша жүлделі І орынды аудан әкімі аппаратының қызметкерлері, ІІ орынды аудандық прокуратура қызметкерлері иеленсе, аудандық орталық аурухана қызметкерлері ІІІ орынға табан тіреді.
Айта кетейік, Сейітов Өтеген Сейітұлы 1923 жылы 15 қыркүйекте Ақтөбе облысы Шалқар ауданының Ақтоғай ауылында дүниеге келген.
Ұлы Отан соғысының ардагері. Көрнекті мемлекет және қоғам қайраткері.
1966–1984 жылдар аралығында Республика прокуратурасын басқарған.
Республиканың еңбек сіңірген заңгері, Прокуратураның құрметті қызметкері, 1-сыныпты мемлекеттік әділет кеңесшісі.
«І дәрежелі Отан соғысы», «Қызыл Жұлдыз», «Құрмет белгісі», «Құрмет» ордендерімен, екі мәрте – «Еңбек Қызыл Ту» және «Халықтар достығы» ордендерімен наградталған.
Еліміздегі заңдылықты нығайтуға өлшеусіз үлес қосқан Өтеген Сейітұлы Сейітовтің туғанына 100 жыл толу мерейтойына орай және оның есімін ел есінде қалдыру мақсатында 2023 жыл прокуратура органдары үшін «Сейітов жылы» деп жарияланды.
