Бүгін Созақ аудандық «Мыңжылқы» мәдениет үйінде 1 қазан – Халықаралық қарттар күніне арналған «Ата қайратты болса-бала ғибратты болады» атты мерекелік іс-шара өтті.
Салтанатты жиынға аудан әкімі Мұхит Тұрысбеков қатысып, ақсақалдар мен әжелерді құттықтады.
– Халқымызда «Қариясы бар ел – қазыналы ел» деген тағылымды сөз бар. Біз әрқашан қариясын қадірлеп, ардагерін ардақтаған текті елдің ұрпағымыз. Әркез алдыңғы буын аға-апаларымыздың ел дамуы жолындағы ерен ерлігі мен қажырлы еңбегін үлгі тұтамыз. Өйткені, ғұмыры ғибратқа толы ардақты ардагерлердің жүріп өткен жолы – өнеге мен тағылым мектебі,-деген аудан басшысы Мұхит Сексенбайұлы еңбек жолымен үлгі болып жүрген аға буын өкілдеріне алғыс хат табыс етіп, құрмет көрсетті.
Сонымен қатар, қарттарға деген ізгі тілегін арнаған аудандық мәслихаттың төрағасы Ордабек Жәмиев, «Аманат» партиясының Созақ аудандық филиалының төрағасы Ернар Сағындықов қазыналы қарияларды аудандық мәслихат аппараты және «Аманат» партиясының алғыс хаттары мен марапаттады.
Аудандық ардагерлер кеңесінің төрағасы Қабылбек Еспенбетов бильярдтан аудан ардагерлері арасында өткізілген жарыста орын алған ардагерлерге арнайы диплом мен сый-сияпат табыс етіп, құттықтауын жеткізді.
«Белсенді ұзақ өмір және Тең қоғам» әлеуметтік орталығында өткен спорттық сайысқа 70 жасқа дейінгі және 70 жастан асқан қариялар екі топқа бөлініп өзара бақ сынасқан болатын.
Дәлдік пен ептіліктерін, жақсы ойын өрнегін көрсеткен 70 жастан асқан ардагерлер арасында I орын Беков Құлахмет, II орын Сәрсен Кеңес, III орынды Нажимов Шубай иеленіп, 70 жасқа дейінгі ардагерлер арасында І орын Маханов Ерғали, II орынды Жасұланов Ержан, III орынмен Аханов Қондыбай марапатталды.
«Сырлы Созақ» ардагерлер хор ұжымы мен өнерпаз ардагерлер және “Мыңжылқы” мәдениет үйінің әншілері халық әндерін орындалып, меркелік шара концерттік бағдарламаға ұласты.
