Ордабасы ауданының әкімі Азат Оралбаев 1 қазан – халықаралық Қарттар күніне орай Қажымұқан, Төрткүл, Қараспан, Бадам ауылдық округтеріндегі еңбек ардагерлерінің шаңырақтарына барып, мерекелерімен құттықтады.
Қазыналы қарияларға құрмет көрсеткен аудан басшысы ақсақалдардың өсиетін тыңдап, ізгі тілегін жеткізді.
Сонымен қатар аудан басшысы Темірландағы «Шапағат» әлеуметтік қызметтер көрсету орталығындағы қарттар қауымымен кездесіп, қарияларымызды мерекемен құттықтады.
«Баршаңызды мерейлі мерекелеріңізбен құттықтаймын. Ардагерлер – еліміздің алтын қоры. Тәжірибесі мол аға буынның өмір жолы біз үшін аса құнды. Сондықтан xалқымыз ертеден-ақ үлкенге құрмет көрсетуді өсиет етіп, ұрпақтар арасындағы сабақтастыққа, үйлесімге ерекше мән берген. Ендеше ортамызда осылай ақыл-кеңестеріңізді айтып жүре беріңіздер!», деді аудан әкімі өз құттықтауында.
Аудан әкімі Керемет Байдаулетова, Шамбек Рахманова, Орынкүл Құрманбекова, Темирхон Яхудаев бастаған Тыл еңбеккерлері мен Ұлы Отан соғысының ардагері Қалмен Мұратов ақсақалдың шаңырағында болып, қарттарымызға естелік сыйлықтар тарту етілді. Осынау құрмет-қошеметке ризашылықтарын білдірген ардагерлер аудан басшысына ақ батасын берді.
