Шәкірттердің ой — өрісін дамытуға, олардың қиялына қанат бітіріп, тіл байлықтарының молаюына тәрбиешілердің сіңірер еңбегі зор. Атақты ұлы педагог Шалва Амонашвили «Тәрбиеші бұл — өзге адамның дамып жетілуін өз жауапкершілігіне алатын кәсіби адам» — деп атап өткен болатын. Иә, бұл кез-келген тәрбиешінің қолынан келе бермейтін қасиет. Бұл тек қажырлы да, өз жұмысын жақсы көретін, өз шәкірттерін биік шыңға жетелегісі келетін ұстаздың қолынан келеді. Бүгінгі Еңбек адамы айдарындағы кезекті мақаламыз жұмысы күрделі де, жауапты мамандықтардың бірі тәрбиешілікті кәсібіне айналдырған кейіпкеріміз Ахмет Майра Өтегенқызы жайлы болмақ.
Бүгінде Түркістан облысының адами әлеуетті дамыту басқармасының Түркістан қаласының адами әлеуетті дамыту бөлімінің «Келешек» санаториялық бөбекжай балабақшасы» мемлекеттік мекемесінің тәрбиешісі қызметін жоғары деңгейде атқарып келе жатқан Майра Өтегенқызы, бала жанының жүрегіне жол тауып, олардың өсіп, танымының кеңеюіне, жан — жағын танып білуіне, өмір жолына бағыт бағдар берудегі өзінің ізденімпаздық қабілетілігімен танылған білікті мамандардың бірі. Білімі жоғары. Өз ісін жетік меңгерген, үнемі ізденіс үстіндегі жаңашыл, білікті маман.
Сонымен қатар, «Келешек» санаториялық бөбекжайында 2015 жылдан бері бастауыш кәсіподақ ұйымының төрағасы ретінде кәсіподақ қозғалысын дамытуға сүбелі үлес қосып келеді. Қоғамдық жұмыстарға белсене араласып, ұжымдағы қызметкерлердің әлеуметтік жағдайларын арттыру, денсаулықтарын нығайту, еңбек жағдайларын жақсарту, қауіпсіз еңбек ортасын құру және тағы да сол сияқты қоғамда жүрген өзекті мәселелерді оңтайлы шешіп, жұмыскерлердің мүддесін қорғау бағытында көптеген жұмыстар атқаруда.
Еңбек жолында бүлдіршіндерді тәрбиелеуде, осындай қым — қуат тіршіліктен шаршамай, талмай еңбек етуінің нәтижесінде тәжірибелі ұстаздық еңбегі үшін 2017 жылы «Ұлағатты ұстаз» төсбелгісімен, ал 2020 жылы «Түркістан салалық білім және ғылым қызметкерлері кәсіподағының» Түркістан облыстық ұйымы кәсіподақ мүшелерінің еңбек, әлеуметтік-экономикалық құқықтары мен мүдделерін қорғау және білім беру саласындағы ерекше еңбегі үшін салалық кәсіподақтың «Кәсіподаққа еңбегі сіңген қызметкер» төсбелгісімен марапатталған.
Сондай-ақ, қажырлы еңбегінің арқасында Майра Өтегенқызы әр жылы қала, облыс әкімдігі мен салалық кәсіподақтың, білім басқармасының түрлі деңгейдегі Диплом, Құрмет грамотасы, Алғыс хаттарымен марапатталған.
Ұжым арасында сыйлы, қызметкерлердің құрметіне бөленген жан. Қорыта келе кейіпкерімізге жас жеткіншектердің тәрбиесі мен кемел келешегіне ықпал етіп, сапалы білім, саналы тәрбие берудегі жұмыстарына сәттілік тілей отырып, алдағы уақытта алар асуларыңыз бен бағындырар белестеріңіз көп болсын тілейміз!
