Сайрам ауданында «Күміс жас» жобасына сәйкес, аудандық жұмыспен қамту орталығы тарапынан жылдық жоспар бойынша 180 адамды қамту көзделген. Бүгінгі таңға 178 адам аталған бағдарламаға тартылған, деп хабарлайды Түркістан облысының Өңірлік коммуникациялар қызметіне сілтеме жасаған 4tagan.kz ақпараттық агенттігі.
Тарқата айтсақ, жобаға 50 жастан асқан жұмыссыз адамдар қатыса алады және қатысу мерзімі 36 айдан аспайды. Жоба шеңберінде жұмысқа орналасқан адамдар үшін алғашқы 12 айында жалақы мөлшерінің 70 %-ын құрайды, бірақ 30 АЕК-тен аспайды. Қатысудың 13-ші айынан бастап 24-ші айына дейін жалақы мөлшерінің 65 %-ын құрайды, бірақ 30 АЕК-тен аспайды.
Сондай-ақ, жобаға қатысудың 25-ші айынан бастап 36-шы айына дейін жалақы мөлшерінің 60 %-ын құрайды, бірақ 30 АЕК-тен аспайды.
«Күміс жас» жобасы аясында зейнеткерлікке шығуға 2 жыл қалған азаматтар уақытша жұмыспен қамтылады. Жобаға қатысушылардың жалақысы жартылай мемлекет тарапынан және жартылай жұмыс беруші тарапынан төленеді.
Айта кетсек, жобаға қатысу мерзімі аяқталған соң, жұмыс беруші зейнет жасына жақындаған адамды кемінде 1 жыл мерзімге тұрақты жұмысқа қабылдауға міндетті.
