Түркістан қаласын жасыл желекпен көмкеру және шаһардың тазалығын қамтамасыз ету жұмыстары қала билігінен бөлек облыс деңгейінде іске асырылып келе жатқаны белгілі. Осыған орай, Түркістан облысы Табиғи ресурстар және табиғат пайдалануды реттеу басқармасының бастамашылығымен «Жасыл аймақ» ЖШС, Отырар орман шаруашылығы, Шәуілдір Балтакөл орманшылары, Сауран аудандық өрт сөндіру бөлімі, «Сырдария-Түркістан» табиғи паркінің 150-ге жуық еріктілері Сырдария өзені маңы мен тоғайдың қорғалатын аймағын қоқыстардан тазартуға кірісті. Сонымен бірге, Түркістан қаласының саялы орындарының тазалығын сақтау шараларына да мұрындық болды.
Түркістан облысы Табиғи ресурстар және табиғат пайдалануды реттеу басқармасының бөлім басшысы Данияр Сейітовтің баяндауынша, Мемлекет басшысының 2020 жылғы 1 қыркүйектгі «Жаңа жағдайдағы Қазақстан: іс-қимыл кезеңі» атты Қазақстан халқына Жолдауында Республика аумағында экологиялық ахуалды жақсарту үшін 2 млрд түп әртүрлі ағаш көшеттерін отырғызуды белгілеген болатын. Соған орай Қазақстан Республикасы Экология, геология және табиғи ресурстар министрлігі мен Түркістан облысының әкімдігі бірлесіп кешенді жоспар қабылдады. Облыс бойынша бес жылда 132 мың гектарға 210 миллион ағаш көшеттерін отырғызу бойынша жұмыстар атқарылуда.
Сонымен қатар облыс әкімінің бастамасымен Түркістан қаласының экологиялық ахуалын жақсарту мақсатында 2019-2022 жылдары қала айналасынан 7700 гектар жерге «Жасыл белдеу» құру жоспарланып, бүгінгі таңда барлығы 13629 гектар жерге көшеттер егіліп, күтіп-бапталуда. Алдағы жылдары «Жасыл белдеу» аумағын 30 мың гектарға жеткізу жоспарлануда.
Дүниежүзілік тазалық күніне орай облыстағы мекемелер мен кәсіпорындар, оқу орындарының мұғалімдері, аудандар мен ауылдық елді мекендердің тұрғындары айналасын қоқықстардан тазартуға кірісті.
