Өткен жылы тақырыбымызға сай «Таза табиғат» экологиялық жобасы басталғаны белгілі. Осы жоба биыл да өз жалғасын тауып кешенді шаралар қолға алынып келеді. Республика аумағында іске асырылып жатқан «Таза табиғат» экологиялық жобасы Түркістан қаласының аумағында өз жалғасын тапты және бұл шара жүйелі бақылауға алынған. Экология, геология және табиғи ресурстар министрлігі және облыстық әкімдіктердің бірлескен шарасына экология, геология және табиғи ресурстар министрлігі өкілдері мен жергілікті билік азаматтары арнайы қатысты. Жиын барысында бірнеше аймақта ағаш отырғызу, айналаны қоқыстан тазарту, су көздерін ашу акциялары өтті.
Қазіргі таңда Түркістан облысы бойынша 3 млн 131 мың га орман қоры жерлері бар, оның ішінде орманмен көмкерілген алқабы 1 млн 630 мың гектар. Айта кетерлігі, облыс аумағымен қатар Түркістан қаласының жағымды табиғатын қалыптастыру шарасы күн тәртібінен түспейді. Осыған байланысты Түркістан облысы әкімдігі мен министрлік бірлесе қабылдаған кешенді жоспарға сәйкес, 2025 жылға дейін өңір аумағында және соның ішінде басымдық берілген Түркістан қаласында жалпы аумағы 110210 гектарға 170 миллион түп көшет егілмек.
Шара жаңа әуежай жолындағы «DALA FRUIT» ЖШС-ның жеміс бауының жұмыстарымен танысып, отырғызылған өрік ағашының өнімділігін бақылаумен басталды. Бұған дейін алма ағашының бірнеше түрі егілген бауға биыл қара өріктің 10 түрінен 276 657 көшет отырғызу жоспарлануда. Сонымен қатар, дәл осы бауда қауын- қарбыз өсіріліп, сатылымға шығатын болады. Жиын Қожа Ахмет Ясауи кесенесі маңындағы Ботаникалық бақта жалғасын тапты. Оған Әзірбайжан, Башқұртстан, Қырғызстан, Мажарстан, Өзбекстан, Саха, Тәжікстан, Түркия елдерінен келген түрлі баспа және электронды БАҚ өкілдері қатысып, ағаштар отырғызды. Саябақтар, аллеялар абаттандырылып, сенбілік ұйымдастырылды.
«Түркі әлемінің бесігі болған киелі мекеннің гүлденуі ел абыройын арттырады. Көркейіп жатқан қалаға келген қонақтардың көзі алдымен айналаның тазалығы мен жасыл желекке түседі. Біз айналаны көгалдандыру мен тазартудан бастауды дәстүрге айналдыруымыз керек. Мұндай акциялар халықтың экологиялық мәдениетін, табиғатқа жанашырлықты арттырады. Қазақстанда экология проблемаларына бейжай қарамайтын, осындай шараларға белсенді қатысатын азаматтар санының көбеюі бәрімізді қуантады», – деді министр.
Түркістанды көгалдандыру үшін жергілікті климатқа жарайтын ең әдемі, ең шырайлы жыл он екі ай бойы гүлдеп тұратын талдар арнайы әкелінген. Түркістан облысы әкімінің бақылауымен шаһар басшылығының іске асырып жатқан Түркістан қаласын көгалдандыру үшін жасалынып жатқан жобалар өз нәтижесін береді деп сенеміз.
