Бүгін Сауран ауданының әкімі Ғ.Рысбеков 2022 жылдың 9 айы бойынша атқарылған жұмыстарымен және алдағы уақытта жүзеге асырылатын жұмыс жоспарлары туралы бекітілген кестеге сәйкес, Иассы ауылдық округінің тұрғындарымен кездесті.
Мемлекет басшысы Қасым-Жомарт Тоқаев «Барлық деңгейдегі әкімдер жыл бойы халықпен кездесулер өткізсін. Олардың барысында халықты толғандыратын әлеуметтік мәселелерге баса назар аудара отырып, Қазақстанды жаңғыртудың жаңа бағдарының негізгі бағыттары туралы хабардар етсін және проблемалық мәселелерді шешудің жолдары мен мерзімдерін түсіндірсін» деп тапсырма берген болатын.
Кездесу барысында алдымен аудан әкімі жеке қабылдау өткізді. Оған ауыл тұрғыны У.Исаков жер мәселесін алға тартты. Ауыл тұрғынының мәселесі бойынша жауапты бөлім басшыларына нақты тапсырма беріп, алдағы уақытта шешілетінін жеткізді.
Бұдан соң әдеттегідей аудан әкімі Ғани Құрмашұлы аудан көлемінде атқарылып жатқан жұмыстар туралы және оның ішінде Иассы ауылдық округі бойынша кеңінен тоқталып өтті. Еркін форматта өткен кездесу барысында тұрғындар тарапынан бірнеше мәселелер көтерілді. Атап айтсақ, ауылда интернет желесі нашар қабылдайтынын, осы мәселені шешуді, ауыз су, электр энергия, қоғамдық көлік, жол, ауылға бейне бақылау камерасын қою, табиғи газ, мектеп, мәдениет үйін салу, тағы да басқа көптеген мәселелер көтерілді. Ауыл тұрғындарының көтерген мәселелері бойынша аудан әкімі Ғани Құрмашұлы заң аясында кезең-кезеңімен шешілетінін, бұл бойынша тұрақты бақылауда болатынын жеткізді.
