Биылғы жылы Мемлекет басшысы Қасым-Жомарт Тоқаевтың Жарлығына сәйкес аудан әкімдерінің халықпен өткізетін кездесулеріне өзгерістер енгізілді. Енді аудан әкімдері тоқсан сайын тұрғындармен кездесіп, халықтың мұң-мұқтаждарын тыңдайтын болады. Осыған орай бүгін қала әкімі Жандос Тасов ауылдарды аралап, халықпен кездесу өткізуді бастаған.
Халықпен кездесуге ауыл әкімдері, сала және мекеме басшылары, ішкі істер бөлімі, медицина саласының басшылары қатысты.
Жандос Қалмұрзаұлы кездесу еркін форматта өткізілетініне тоқталып, алдағы уақытта ауыл халқымен жиі-жиі кездесетінін жеткізді. Мұнан соң қалада атқарылып жатқан жұмыстар мен алдағы жоспарларды баяндады.
Ауыл тұрғындары тарапынан жолды асфальттау, электр бағаналары мен желілерін жаңалау сияқты мәселелерді көтеріп, елді мекенді газдандыру жайын жеткізді.
Қала әкімі Жандос Тасов тұрғындар көтерген мәселелердің әрбіріне жеке-жеке тоқталып, сұрақтарға жауап берді. Халықтың айтқан әрбір ұсынысын назарда ұстап, олардың оңтайлы шешілу жолдары қарастырылатынын жеткізді.
Қала әкімі Жандос Тасов ауылдарға жасаған сапары кезінде жеке қабылдауға жазылған азаматтарды қабылдап, олардың мұң-мұқтаждарын тыңдады. Осы сәтке дейін, қала басшысы Ащысай, Хантағы ауыл тұрғындарымен кездескен болатын.
