Бауыржан бала кезінен спортқа бейім болып өсті. Соның ішінде қазақша күресті жақсы көрді. Ептілігі де, білек күші де бар. Мектепаралық жарыстардан үйге жеңіспен оралып жүрді. «Мектептің мақтанышы» атанды. Енді, міне, сол чемпион балам маған немере сыйлап, шаңырағымыз тағы да бір чемпионмен толықты.
2013 жылы туылған Айсұлтан немерем қазір Түркістан қаласындағы №28-ші мектеп-лицейінің 4-сынып оқушысы. Оқуда озат, білімге — зерек, спортқа — бейім. Немерем «Тұран-2013» футболшылар командасының белді ойыншысы. Немеремді жиі іздеп барып тұрамын. Әр барғанымда мектебіне соғамын, жаттығатын жерлеріне барып, баламның қалай жаттығып жүргенін көріп, көңілім бір серпіліп қалады. «Баланы өскенше, немерені өлгенше» деген осы екен ғой. Жасым 70-тен асса да, денемді шынықтырып, саламатты өмір салтын қалыптастырып келе жатқан жағдайым бар. Немерем ауылға келгенде, бірге доп қуалап, оған кейбір әдіс-тәсілдерді үйретіп қоямын. Айтқанды, көргенін тез қабылдағыш, әрі зерек. Жалпы, үй-ішімізбен спортшымыз десек, артық айтқандығым емес.
Түркістан облысының 5 жылдығына орай 2013-2014 жылдары туылған жасөспірімдер арасында футболдан өткен «Turkistan Cup – 2023» республикалық турнирінде немерем — Айсұлтан Бауыржанұлы «Үздік ойыншы» атанып, жарыстың «Дипломымен» марапатталып, мерейімізді тағы да үстем еткен болатын. Кәдімгідей қуанып қалдық. «Бала атқа мінсе, ата-анасы тақымын қысады» демекші, тілеуін тілеп отырдық. Оған дейін Алматы, Ақтөбе қалаларында өткен жарыстарда спорттың осы түрінен 2-орынды қанжығалаған болатын. Бұрындары «асық ойнаған азады, доп ойнаған тозады» деуші еді, қазіргі таңда доп ойнағандар озып тұр. Аталмыш «Тұран-2013» футболшылар командасы Хорватия еліне барып, халықаралық жарысқа қатысып келді. Команданың сапында Айсұлтан да бар. Беталыстары жаман емес. Әлі де талай биік белестерді бағындыратыны сөзсіз.
Футболға 5 жасынан қатысқан Айсұлтан 2018 жылдары Шымкент қаласындағы «Armans» академиясында, 2021 жылдан бастап Түркістан қаласындағы «Тұран-2013» командасында жаттығып жүр. Немеремнің жетістігі басқа жастарға да үлгі болса деймін. Спорттың қай түрі болса да ізденсең, еңбектенсең, талаптансаң биік шыңдарды бағындыруға болатынын жастарға жеткізгім келеді. Ал, ата-аналарға айтарым; балаларыңыздың болашағы өз қолдарыңызда… Қайда бағыттаймын, қалай бағыттаймын деп емес, баланың қабілетіне, бейіміне қарай жұмыс жасау керек!
Р.КЕНЖЕҚҰЛОВ,
ардагер-спортшы.
