Бүгін аудандық Мәдениет үйінде аудан әкімдігінің ұйымдастыруымен «31 мамыр — саяси қуғын-сүргін және ашаршылық құрбандарын еске алу күніне» арналған іс-шара өтті.
Азаттық жолында құрбан болған бабаларымызды еске алу, рухына тағзым етуді мақсат еткен шараға зиялы қауым өкілдері, қуғын — сүргін құрбандарының ұрпақтары, білім саласының ардагерлері мен мекеме қызметкерлері қатысты.
Тағылымы мол шарада аудан әкімінің орынбасары Қ.Сейітқұл сөз алып, өнегелі іс арқылы өскелең ұрпақтың санасына, бойына отансүйгіштік, елжандылық, ұлтжандылық қасиеттерді сіңірген бабалар мұрасы жайында ой бөлісті.
Атаулы күнге орай аудандық «Дәулеталыұлы Бегалы-ата» мешітінің найб имамы Н.Шалхаров саяси қу¬ғын-сүргін құрбандарын еске алып, бабалар рухына құран бағыштады.
Мәдениет үйінің өнерпаздары сахналаған «Ботакөз» қойылымы репрессия құрбандарының басынан өткен тар кезең, тайғақ тағдырды көрерменге әсерлі түрде жеткізе білді.
Аудандық орталық кітапхана ұжымы ХХ ғасырдың басында талайды сарсаңға салып, қасірет шектірген қуғын-сүргін және ашаршылық оқиғасына байланысты «Зұлмат жылдар — жан жарасы» атты кітап көрмесін ұйымдастырды.
Ордабасы ауданы әкімдігінің баспасөз қызметі
