Бүгін барлық білім ордаларында соңғы қоңыраудың күміс үні сыңғырлайтын күн. Айтулы мерекеге орай Ордабасы ауданының барлық елді мекендеріндегі білім беру мекемелері мерейлі сәтті атап өтті.
Қараспан ауылындағы Б.Оңтаев атындағы жалпы орта мектебінде өткен салтанатты шараға аудан әкімінің орынбасары Қыдыр Сейітқұл қатысып, оқушылар, ата-аналар мен ұстаздарды оқу жылының аяқталуымен құттықтады.
Аудан әкімінің орынбасары Қыдыр Сейітқұл мектеп бітіріп жатқан түлектерге алда үлкен сын — ұлттық бірыңғай тестілеуден абыроймен өтіп, терең білім алу жолында жан-жақты ізденуге шақырды.
Сондай-ақ мерекелік шараға мектептің 20 жылдық және 40 жылдық түлектері қатысып, түлектер атынан Ордабасы ауданының Құрметті азаматы, белгілі журналист Әсет Әссанди сөз алып, мектеп бітіруші түлектерге ақ тілегін білдіріп, ардагер ұстаздарға сыйлық табыстады.
Айта кетерлігі, биыл ауданымызда 1847 түлек мектеп бітіріп отыр. Оның 1603 алдағы өтетін Ұлттық бірыңғай тестілеуге қатысуға өтініш берген. Бұл жалпы мектеп бітірушілердің 87 пайызын құрады. Мектеп бітірушілердің 93 оқушысы «Алтын белгіге»,144-і үздік аттестатқа үміткер.
Ордабасы ауданы әкімдігінің баспасөз қызметі
