«Конгресс Холл» көпсалалы кешенінде Нұрсұлтан Назарбаев Қорының ұйымдастыруымен «Қайырымдылық керуені» байқауының жеңімпаздарын салтанатты марапаттау рәсімі өтті.
Байқау төртінші жыл қатарынан еліміздің түкпір-түкпірінен ең батыл, қамқор әрі мейірімді жандарды анықтап келеді. Байқауға қатысушылар еселі еңбегімен, игі істерімен отансүйгіштік қасиетін танытқан әрі мұқтаж жандарға әрдайым көмек көрсетуге дайын шын жанашыр адамдар.
Марапаттау рәсіміне Нұрсұлтан Назарбаев Қорының атқарушы директорының орынбасары Әлкей Марғұланұлы мен Қазақстан іскер әйелдер қауымдастығының президенті Раушан Сәрсембаева қатысты.
«Түркістан – ұлтымыздың өшпес рухани құндылықтарын 1500 жылдан астам уақыт бойы сақтап келе жатқан өлке. «Қайырымдылық керуені» байқауының ақтық сайысының дәл осы жерде өткізілуі тегін емес.
Себебі, біздің дәстүрлі байқауымыз адамгершілікті, мейірімділікті ұлықтайды. Жыл сайын «Қайырымдылық керуені» байқауы еліміздің түкпір-түкпірінен 1000-нан астам қайырымды әрі батыл жандарды анықтайды», — деді Әлкей Марғұланұлы.
Салтанатты іс-шара барысында жеңімпаздар «Асар», «Туған жер», «Батыл жүрек», «Мейірім жолында», «Қайырымдылық тарихы», «Бала жүрегі», «Жануарға мейірім» сынды жеті номинация бойынша медальдармен және бағалы сыйлықтармен марапатталды.
Сондай-ақ, шарада Р.Бағланова атындағы «Қазақконцерт» мемлекеттік концерттік ұйымының, «Астана Опера» мемлекеттік опера және балет театрының өнерпаздары өнер көрсетті.
