Бүгін аудан орталығы Темірланда ҚР Президенті Қасым-Жомарт Тоқаев Конституцияға түзетулер енгізу бойынша 5 маусымда өтетін республикалық референдумды қолдау мақсатында құрылған штаб отырысы өтті.
Отырысқа аудан әкімі Бағлан Батыршаев, аудандық Мәслихат хатшысы Қасымбай Әбдіхалық, «AMANAT» партиясы аудандық филиалы жанынан құрылған аудандық штаб төрағасы Әлиасқар Бердімұрат, штаб мүшелері, ардагерлер кеңесі, зиялы қауым өкілдері мен ҮЕҰ төрағалары қатысты.
«Бұл реткі саяси науқанның ел өміріндегі маңызы ерекше. Сондықтан ауданымыздың әр ауыл, елді мекендерінде Ата Заңымызға енетін толықтырулар мен өзгерістер туралы толыққанды түсінідіру жұмыстарын жүргізуіміз қажет. Бұл мақсатта әр ауылдық округтерде кездесулер өткізіліп, халықтың маңызды саяси оқиғаға белсене қатысуын қамтамасыз етуіміз керек. Бұл бірінші кезекте Мемлекет басшысының халқымыздың өмірін, тұрмыс деңгейін жақсартуға бағытталған жаңа бастама екендігін түсінетін сәт келді», деді аудан әкімі штаб отырысында.
Кездесуде жиынға қатысушылар Президентіміз ұсынған оң өзгерістер мен реформалардың іске асуына, Жаңа Қазақстанның қалыптасуына үлес қосу – әрқайсымыздың негізгі азаматтық борышымыз екендігіне тоқталды.
Елімізді демократиялы, әділетті және өркениетті мемлекет етуге бағытталған өзгерістердің бастауы саналған бұл жобаны ауданның зиялы қауым өкілдері, ардагерлер мен жастар қолдап, игі істерге атсалысуға дайын екендіктерін айтып өтті.
Сондай-ақ, отырыс соңында жекелеген топтарды күшейтуді емес, мемлекетімізді жетілдіру, жаңғырту және нығайтуды көздейтін референдумға дауыс беруге шақырды.
Айта кетерлігі, референдум – қазіргі таңда қоғам арасында қызу талқыланып, көпшіліктен қолдау тауып отыр. Конституцияны бүкілхалықтық дауыс беру арқылы өзгерту – халықтың еркін білдіруінің айқын көрінісі болмақ.
Бүгінгі таңда республикалық референдумды қолдауға бағытталған аудандық штабтың үгіт-насихат жұмыстары бастау алды.
Ордабасы ауданы әкімдігінің баспасөз қызметі
