Ордабасы ауданына тартылған инвестиция көлемі былтыр жыл қорытындысы бойынша 23 млрд 156 млн теңгеге жетіп, 2020 жылмен салыстырғанда 5 млрд 712 млн теңгеге артқан. Ал, биылғы межені 32 млрд. теңгеге жеткізу жоспарлануда. Бұл туралы бүгінгі брифингте Ордабасы ауданының әкімі Бағлан Батыршаев мәлімдеді.
«Өңірде жалпы 11 мыңнан астам шағын және орта кәсіпкерлік субъектілері қызмет атқаруда. Оларда ауданның 17 мыңнан астам тұрғыны жұмыс істейді. Аудан экономикасының жетекші бағыттарының бірі ауыл шаруашылығы саласы. Аталған саланың өнім көлемі өткен жылы 65 млрд 699 млн теңгені құрадв. Бұл көрсеткіш 2020 жылмен салыстырғанда 15 млрд теңгеге ұлғайған. Биыл бұл көрсеткішті 11%-ға арттыру көзделуде»-деді Бағлан Дәнебекұлы.
Өткен жылы аймақта 4 534 тұрақты және уақытша жұмыс орындары ашылған. Ал, биыл Еңбек бағдарламасының негізінде 3 мыңнан астам адамды жұмыспен қамту жоспарлануда.
Түркістан облысының Өңірлік коммуникациялар қызметі
