Аудан орталығы Темірланда «Amanat» партиясы филиалының жанынан құрылған « Парасат» пікірталас клубының кезекті отырысы өтті.
Жиынға «Amanat» партиясы Ордабасы аудандық филиалы төрағасы, аудан әкімі Бағлан Батыршаев, Мәслихат хатшысы Қасымбай Әбдіхалық, «Amanat» партиясы аудандық филиалының Атқарушы хатшысы Әлиасқар Бердімұрат, клуб мүшелері, салалық бөлімдер мен мекеме басшылары, мәслихат депутаттары, БАҚ өкілдері қатысты.
Осы реткі клуб отырысында ауыл шаруашылық саласындағы өзекті мәселелер және шешу жолдары кеңінен талқыланды.
Отырысты клубтың бірінші отырысында төраға болып сайланған Қарақұм елді мекенін тұрғыны, кәсіпкер Досым Құрманбек жүргізіп, күн тәртібіндегі 2 мәселені көптің талқысына салды.
Күн тәртібіндегі бірінші мәселе бойынша Құрманбек Базарбекұлы баяндама жасады. Ал, баяндамада көтерілген сын-ескертпелер бойынша аудандық ауыл шаруашылығы және жер қатынастары бөлімінің басшысы Әбілда Әлібеков баяндама жасап, көктемгі дала жұмыстары, ағын су, тыңайтқыш, егістікке қажетті жанар-жағармай бағасын тұрақтандыру туралы кеңінен айтып берді.
Жиында клуб мүшелері А.Күдірбекұлы ағын су, Қараспан ауыл округінде жердің сорлануы және мал ұрықтандыру пунктері туралы, С.Еркөбек жерлерді қайтару, жер беру, жерлерді қайта беру кезіндегі сын-ескертпелерді айтса, Ғ.Шенгелов, Н.Иманқұлұлы, Ж.Өтеген жеңілдікпен берілетін жанармай, тыңайтқыш, дала егістіктерін егу мәселелері бойынша өз ойларын ортаға салды.
Алқалы жиында көтерілген мәселелер бойынша аудан әкімдігінің тиісті бөлімдері мен мекеме басшылары тарапынан жауаптар берілді.
Күн тәртібіндегі екінші мәселе бойынша келесі отырыста каралатын мәселені анықтау мен отырыс төрағасын сайлау және өткізілетін уақытты бекіту бойынша «Amanat» партиясы аудандық филиалының Атқарушы хатшысы Әлиасқар Бердімұрат ұсыныс жасап, бірауыздан қабылданды.
Жиын соңында аудан әкімі Бағлан Дәнебекұлы айтылған сын-ескертпелер бойынша нақты жауаптар беріп, отырысты қорытындылады.
Ордабасы ауданы әкімдігінің баспасөз қызметі
