Бүгін аудан әкімдігінің Жалпы және әкімшілік бөліміне келіп түскен өтініштер бойынша аудан әкімі Бағлан Батыршаев жеке қабылдау өткізді.
«Ашық әкімдік» кеңсесінде өткен кездесуге Қараспан, Бөген, Бөржар ауылдық округтерінен 10 нан астам тұрғын қатысып, өздерін толғандырған мәселелер бойынша баяндады.
Жеке қабылдау барысында тұрғындар тарапынан Мақташы елді мекеніндегі ескі мектептің жеріне демеушілердің есебінен жабық спорт алаңшасын салу, Сарыарық ауылында спорттық алаңша салуға ықпал жасау, Арыс өзені арнасының бұзылуы сынды бірқатар мәселе көтерілді.
Өз кезегінде аудан басшысы ауыл жастарының болашағы үшін қолға алынған жобаларға әрқашан қолдау білдіруге әзір екендігін жеткізді.
«Бүгінде Президентіміздің тапсырмасына орай еліміздің барлық ауыл, елді мекендеріне спорттық нысан салу, ауыл тұрғындарын бұқаралық спортқа баулу көзделген. Сондықтан жеке кәсіпкерлер есебінен спорттық алаңша, жеке меншік мектеп салуға ниетті азаматтар болса, қолдауға дайынбыз», — деді аудан әкімі тұрғындарды қабылдау кезінде.
Кездесуге келген азаматтарды мұқият тыңдаған Бағлан Дәнебекұлы халықпен байланысты тиімді ұйымдастырып, ауылдастардың мәселесін оңды шешуге ықпал ететіндігін мәлімдеді.
Сондай-ақ, аудан басшысы жеке қабылдауда көтерілген мәселелерді әкім орынбасарлары мен құрылымдық бөлім басшыларына жүктеп, өтініштердің уақытылы орындалуын қадағалуға алуды тапсырды.
Ордабасы ауданы әкімдігінің баспасөз қызметі
