15-17 сәуір күндері Түркістан қаласында «Рухани жаңғыру» бағдарламасының бес жылдығына орайластырылған Ордабасы ауданының мәдениет күндері шымылдығын түрді.
Кеше Түркістанда осы іс-шараның бастамасы ретінде аудан өнерпаздарының концерттік бағдарламасы шаһар көрермендеріне ұсынылды.
Алдымен киелі Самұрық ұясының алдында Қажымұқан Мұңайтпасұлы атындағы облыстық спорт мұражайы күш атасының өмір белестерінен сыр шертетін музей экспанаттарын көрермен назарына ұсынды. Түркістан жұрты өткен тарихтан тағылымы мол мағлұмат алып, тұлғаның бай мұраларына қанықты.
Сондай-ақ, шара барысында қазақ даласының біртуар перзенті туралы кітаптар жиынтығы мен ағаштан ойылған қолөнерлер бұйымдар көрмеге қойылды.
Өнер ұжымдары әзірлеген 19 бағдарламасы аясында Рамазан айының жарапазыны айтылып, ардагер, аяулы аппақ әжелеріміздің күмістей сыңғырлаған әуезді әндері ежелгі қала аспанын әлдилей түсті.
Ауданымыздың жасөспірімдер театрының сахналық қойылымы, ұлттық аспапта орындалған әсем ән мен тәтті күй жиналған жұртты тәнті етті.
Мерекелік шараға аудан әкімінің орынбасары Қыдырбай Сейтқұл, аудандық Ардагерлер кеңесінің төрағасы Ораз Есқараев және қоғам белсенділері, ардақты апаларымыз қатысты.
Арнайы ауданымыздан Түркістан шаһарына алып келінген азық-түлік пен көкөністер жиынтығы сыйлық ретінде шаһарлықтарға тарту етілді.
Мәдени шараның соңғы екі күнінде қолданбалы өнер шеберлерінің көрме-жәрмеңкесі, Өлкетану мұражай жәдігерлері мен ақын-жазушылардың кітап көрмесі, «Ордабасы» фольклорлық ансамблі мен «Арай» аспапты ансамблінің концерті қала тұрғындарына ұсынылса, ауылшаруашылық өнімдерінің жәрмеңкесінен қалалықтар өздеріне қолжетімді бағада аудан өнімдерін сатып ала алатын болады.
Ордабасы ауданы әкімдігінің баспасөз қызметі
