Аудан әкімі Бағлан Батыршаев Қараспан ауылдық округіне қарасты Көлтоған елді мекенінің тұрғыны Айдос Әбітаевтың қуанышымен бөлісті.
Өткенде ғана Түркістан облысының №1 облыстық перинаталдық орталығында дүниеге келген үшемге (3 ұл) бауы берік болсын айта барған аудан басшысы сәбилерге ұзақ ғұмыр тіледі.
«Елімізде демографиялық саясатқа қосқан үлестеріңіз үшін алғысымды білдіремін. Бүгін арнайы сый-сиапатымызбен келіп, үш кішкентай батырға құтты болсын айтып отырмыз. Сәбилер сау денелі болып ержетіп, елге, жерге қызмет ететін үлкен азамат атана берсін», — деді аудан әкімі өз құттықтауында.
Қазіргі таңда жаңа туған нәрестелер Мәулен, Мардан, Мансурдың денсаулығы бірқалыпты.
Ал, үшем дүниеге әкелген Мақпал Абдурахимова үй шаруасында, ал, отағасы жеке кәсіппен айналысуда.
Айта кетерлігі, өткен жылы да Қараспан ауылдық округінде үшем дүниеге келген болатын.
Ордабасы ауданы әкімдігінің баспасөз қызметі
