Астана күні мерекесі қарсаңында Созақ ауданында 25 отбасы жаңа баспананың кілтіне ие болды. Аудан орталығындағы Жеткіншек шағынауданында орналасқан пәтерлер әлеуметтік осал санаттағы азаматтар мен көпбалалы отбасыларға табысталды. Салтанатты рәсімге аудан тұрғындары, еңбек ардагерлері, зиялы қауым өкілдері қатысты. Қоныс иелерін құттықтаған аудан әкімі Мұхит Тұрысбеков Мемлекет басшысының тұрғындардың өмір сүру сапасын арттыру жөніндегі тапсырмалары аясында ауданда тұрғын үй құрылысы қарқынды жүргізіліп жатқанын атап өтті.
Іс-шара барысында аудандық мәслихат төрағасы Ордабек Жәмиев те жаңа қоныс иелеріне ізгі тілегін жеткізді. Өз кезегінде тұрғындар мемлекет тарапынан көрсетілген қолдау үшін ризашылықтарын білдірді. Айта кетейік, тұрғын үйге мұқтаж азаматтарды есепке қою және баспанамен қамтамасыз ету жұмыстары қолданыстағы заңнамаға сәйкес «Отбасы банк» АҚ-ның бірыңғай ақпараттық жүйесі арқылы жүзеге асырылады. Пәтерлер азаматтардың мәртебесіне, тұрғын үйге мұқтаждық деңгейіне және кезектегі орнына сәйкес беріледі.
Созақ ауданында тұрғындарды баспанамен қамту бағытындағы жұмыстар жүйелі түрде жалғасуда. Бұған дейін Мемлекеттік рәміздер күні қарсаңында 29 отбасы жаңа қонысқа ие болса, бұл жолы тағы 25 отбасының баспаналы болды. Қазіргі таңда пайдалануға дайын 22 пәтердің құжаттандыру жұмыстары жүргізілуде. Құжаттар толық рәсімделгеннен кейін тұрғын үйлер кезең-кезеңімен өз иелеріне табысталады. Сонымен қатар, аудан орталығында 20 пәтерлі тұрғын үйдің құрылысы жалғасып жатыр. Бұдан бөлек, «Қазатомөнеркәсіп» ұлттық атом компаниясы» АҚ еншілес ұйымдарының демеушілігімен жаңғырту бағдарламасы аясында 16 пәтерлі екі қабатты тұрғын үйлердің құрылысы жүргізілуде.
