Сарыағаш ауданында елді мекендерді сапалы ауыз сумен қамтамасыз ету мақсатында Ақжар және Дербісек ауылдық округтерінде инфрақұрылымдық жобалар жүзеге асырылуда. Аудан әкімі Арман Абдуллаев құрылыс нысандарын аралап, атқарылып жатқан жұмыстардың барысын тексерді. Дербісек елді мекенінде жерасты су ұңғымасынан суқоймаға дейін жалпы ұзындығы 2.2 шақырымдық ауыз су құбыры тартылуда. Жоба аясында автомобиль жолдарының астынан көлденең бұрғылау әдісімен құбыр өткізу жұмыстары жүргізіліп, сыйымдылығы 160 текше метр болатын темір-бетонды суқоймасының құрылысы басталды.
Ақжар елді мекенінде де ауыз су жүйесінің құрылысы жүргізіліп жатыр. Қазіргі таңда суқоймасын қоршау, диаметрі 110 және 160 мм болатын құбырларды тарту, су құдықшаларын орнату жұмыстары атқарылуда. Бүгінге дейін шамамен 45 шақырым ауыз су құбыры тартылып, 170 су құдықшасы орнатылған. Нысандарды аралау барысында аудан әкімі мердігер ұйымдарға құрылыс қарқынын күшейтіп, жұмыстарды белгіленген мерзімде әрі сапалы аяқтауды тапсырды.
Аталған жобалар толық іске қосылғаннан кейін елді мекен тұрғындары сапалы әрі тұрақты ауыз сумен қамтамасыз етіліп, инженерлік инфрақұрылымның сенімділігі артады. Бұл өз кезегінде халықтың тұрмыс сапасын жақсартып, коммуналдық қызметтердің тиімділігін арттыруға мүмкіндік береді.
Аудан аумағында инженерлік инфрақұрылымды жаңғырту жұмыстары кезең-кезеңімен жалғасып келеді. Ауыз су жүйелерін жаңарту арқылы елді мекендердің әлеуметтік дамуына қолайлы жағдай жасалып, тұрғындарды сапалы ауыз сумен қамту көрсеткішін арттыру бағытындағы жұмыстар жүйелі түрде жүргізілуде.
