Өскемен қаласында ұйымдастырылған «Аламан құрақ – 2026» халықаралық жобасында Ордабасы ауданының құрақшы аналары жоғары белсенділік танытып, тағы бір мәрте аудан абыройын асқақтатты. Жобаға қатысып келген шеберлерді аудан әкімі Азат Оралбаев арнайы қабылдап, ұлттық қолөнерді дамытуға қосып жүрген үлестері үшін алғыс білдірді.
Ауқымды іс-шараға Қазақстанның 17 облысынан және әлемнің 8 елінен келген 800-ге жуық қолөнер шебері қатысты. Қатысушылардың бірлескен еңбегінің нәтижесінде ұзындығы екі шақырымнан асатын алып құрақ көрпе құрастырылып, жаңа рекорд тіркелді. Бұл жоба ұлттық қолөнердің мүмкіндігін ғана емес, халқымыздың дәстүрлі өнерге деген құрметін де айқын көрсетті.
Осындай тағылымы мол, тарихи маңызы зор жобада Ордабасы ауданының намысын қорғаған шеберлер өз өнерлерін жоғары деңгейде танытып, нәтижесінде команда құрамындағы 11 ананың 9-ы алтын, 2 қатысушы күміс медальмен марапатталды. Бұл жетістік аудан қолөнершілерінің кәсіби шеберлігі мен ұлттық өнерге деген адалдығын тағы бір мәрте айқындады.
Айта кету керек, бұл ордабасылық шеберлер үшін алғашқы жетістік емес. Бұған дейін Алматы қаласында өткен халықаралық жобада бір рет, Астана қаласында өткен жобаларда екі рет рекорд орнатқан аудан аналары биыл Өскемен төрінде өткен халықаралық шарада төртінші мәрте рекорд жаңартуға атсалысты.
Кездесу барысында аудан әкімі құрақшы аналардың еңбегіне жоғары баға беріп, олардың ұлттық құндылықтарды дәріптеу жолындағы қызметі өскелең ұрпаққа үлгі екенін атап өтті. Сондай-ақ қолөнер арқылы қазақтың бай мұрасын танытып жүрген шеберлерге ризашылығын білдіріп, алдағы жұмыстарына табыс тіледі.
Ұлттық өнерді ұлықтап, ауданның ғана емес, тұтас елдің мерейін өсіріп жүрген құрақшы аналардың бұл жетістігі Ордабасы жұртшылығы үшін зор мақтаныш.
Жоба аясындағы бұл жетістік ұлттық қолөнердің халықаралық деңгейде мойындалуына жол ашып, қазақтың құрақ өнерінің ерекше қырларын әлемге танытуға үлкен мүмкіндік берді. Қатысушылардың еңбегі дәстүрлі өнерді жаңғыртудың маңызын айқындады.
Сонымен қатар мұндай ауқымды бастамалар өңірлер арасындағы мәдени байланысты нығайтып, шеберлердің тәжірибе алмасуына және шығармашылық әлеуетін арттыруға ықпал ететіні айтылды. Бұл өз кезегінде ұлттық өнердің дамуына серпін бермек.
Кездесу барысында аудан басшылығы тарапынан қолөнер шеберлерін қолдау, олардың еңбегін кеңінен насихаттау және жас буынды осы салаға баулу бағытындағы жұмыстар жалғасатыны жеткізілді.
Сондай-ақ құрақшы аналардың жетістігі тек аудан көлемінде ғана емес, республика деңгейінде де жоғары бағаланып, олардың есімі ұлттық өнерді дәріптеуші тұлғалар ретінде танылып отырғаны атап өтілді.
Осындай игі бастамалар арқылы Ордабасы ауданының мәдени бренді қалыптасып, ұлттық қолөнердің дамуына жаңа серпін беріліп отырғаны ерекше атап өтілді.
