Отырар ауданының әкімі Қайрат Жолдыбайұлы көпбалалы аналарға «Алтын алқа» және «Күміс алқа» төсбелгілерін салтанатты түрде табыстады. Марапаттау рәсімінде аудан басшысы аналарды мерейлі марапаттарымен құттықтап, олардың қоғам мен отбасыдағы ерекше рөлін атап өтті. Сондай-ақ, ұлт болашағын тәрбиелеп отырған аналардың еңбегі әрдайым құрметке лайық екенін айтып, отбасыларына амандық, бала-шағаларына бақ-береке тіледі.
«Алтын алқа» мен «Күміс алқа» – аналардың еселі еңбегі мен ұрпақ тәрбиесіндегі жауапкершілігінің айқын көрінісі. Бұл марапаттар көпбалалы аналарға көрсетілген мемлекет қамқорлығы мен құрметінің белгісі. Ауданымызда бүгінде 703 «Алтын алқа», 1 373 «Күміс алқа» иегері және 66 «Батыр ана» бар. Бұл өңірдегі береке мен бірліктің, отбасы құндылықтарына деген адалдықтың айқын көрінісі. Осындай аналардың арқасында елімізде ұрпақ сабақтастығы сақталып, ұлттық тәрбиенің өзегі нығайып келеді»- деді аудан басшысы.
Салтанатты шара барысында марапат иелері көрсетілген құрмет үшін алғыстарын білдіріп, елдің өсіп-өркендеуіне үлес қосатын саналы ұрпақ тәрбиелеу жолындағы еңбектерін жалғастыра беретіндерін жеткізді.
Салтанатты жиында көпбалалы аналардың өнегелі өмір жолы мен отбасы құндылықтарын дәріптеудегі еңбегі ерекше аталып өтті. Ана тәрбиесі – елдің ертеңін қалыптастыратын басты құндылықтардың бірі екені айтылды.
Сонымен қатар ауданда отбасы институтын нығайтуға, аналар мен балаларды әлеуметтік қолдауға бағытталған мемлекеттік бағдарламалар мен жобаларды тиімді іске асыру жұмыстары тұрақты түрде жалғасып жатқаны атап өтілді.
Шара барысында марапат иелері өзара пікір алмасып, көпбалалы отбасыларды қолдау бағытында көрсетіліп отырған қамқорлыққа ризашылықтарын білдірді. Олар ұрпақ тәрбиесіндегі тәжірибелерімен бөлісіп, отбасы бірлігі мен ұлттық құндылықтарды сақтау мәселесіне тоқталды.
Кездесу жылы әрі мерекелік атмосферада өтіп, аналардың қоғамдағы мәртебесін арттыру мен олардың еңбегін дәріптеудің маңыздылығы кеңінен сөз болды. Мұндай игі шаралар жас буынға отбасы құндылықтарын насихаттауға да оң әсерін тигізетіні айтылды.
Шара соңында марапат иелеріне зор денсаулық, шаңырақтарына құт-береке, ұрпақтарының қызығын көру тілегі білдіріліп, олардың елдің демографиялық өсімі мен рухани дамуына қосып жүрген үлесі әрдайым жоғары бағаланатыны атап өтілді.
