Ордабасы ауданының әлеуметтік дамуындағы маңызды бағыттардың бірі – ауыл тұрғындарын мемлекеттік қолдау арқылы олардың әл-ауқатын арттыру. Бұл бағытта ерекше рөл атқарып отырған бағдарлама – «Ауыл аманаты». Бағдарлама ауыл тұрғындарын қолдауға арналған кешенді шараларды қамтиды және ауданның аграрлық әлеуетін арттыруға, шағын және орта бизнесті дамытуға, жастардың ауылда қалуын қамтамасыз етуге бағытталған.
2024 жылы бағдарлама аясында ауданның бірнеше ауылдық округтерінде скрининг жұмыстары жүргізіліп, ІІІ кезеңге Қажымұқан, Шұбарсу, Төрткүл, Бөген ауылдық округтері енгізілді. 2025 жылы қайтарылған қаражат есебінен 29 жобаға жалпы 152,2 млн теңге қаржыландырылды. Сонымен қатар, аталған 4 ауылдық округте 6 агроөнеркәсіп кешені (АӨК) құрылып, 141,2 млн теңгеге қаржыландырылды.
Атап айтқанда:
-
Шұбарсу ауыл округінен «Алан Нұр» АӨК – 29 млн теңге;
-
Төрткүл ауыл округінен «Төрткүл-Құс» АӨК – 22 млн теңге;
-
Төрткүл ауыл округінен «Төрткүл-Балық» АӨК – 30 млн теңге;
-
Бөген ауыл округінен «Бөген 2030» АӨК – 20 млн теңге;
-
Қажымұхан ауыл округінен «Бейнетқор» АӨК – 20,2 млн теңге;
-
Қажымұхан ауыл округінен «ЕлнұрАйдар» АӨК – 20 млн теңге.
Бағдарлама аясында тұрғындардың табысын арттыруға, жаңа жұмыс орындарын құруға бағытталған бірқатар жобалар іске асырылды. Мысалы, Шұбарсу ауыл округінде арнайы жылыжай кешені үшін 15 гектар жер телімі бөлініп, қажетті инфрақұрылым жүргізілді. Жылыжай салуға ниет білдірген 42 азаматтың 30-ы «Ауыл аманаты» бағдарламасы арқылы 2,5 пайызбен 250 млн теңге несие алып, қазіргі таңда өз жылыжайларын іске қосқан. Бұл жылыжайларда өндірілген өнімдер нарыққа шығарылып, тұрғындардың табысын арттыруға мүмкіндік беруде.
Бағдарламаның тиімділігі – тек қаржылық қолдаумен шектелмейді. Ол ауыл шаруашылығы саласында жаңа технологияларды енгізуге, заманауи әдістерді қолдануға және кәсіпкерлікті дамытуға жағдай жасайды. АӨК құрылымдары арқылы ауыл тұрғындары өз өнімдерін қайта өңдеу, сақтау және сатумен айналысу мүмкіндігіне ие болады, бұл ауылдық экономиканың тұрақтылығын қамтамасыз етеді.
Сонымен қатар, бағдарлама жастар мен әйелдердің ауылда қалуына ықпал етеді. Жас фермерлер мен кәсіпкерлер ауылдағы инфрақұрылымды пайдаланып, өз бизнесін дамыта алады. «Ауыл аманаты» бағдарламасы – Ордабасы ауданындағы ауыл тұрғындарын қолдаудың, олардың әлеуметтік жағдайын жақсартудың және ауылдық экономикадағы тұрақтылықты қамтамасыз етудің тиімді құралы болып отыр.
Қорытындылай келе, «Ауыл аманаты» бағдарламасы Ордабасы ауданында ауылдық кәсіпкерлікті дамытуға, тұрғындардың әл-ауқатын көтеруге және ауыл шаруашылығы өнімдерін өндіру мен сату көлемін арттыруға бағытталған стратегиялық маңызды жоба болып табылады. Бағдарламаның жүзеге асырылуы ауылдық экономиканы әртараптандыруға және жергілікті халықтың өмір сапасын жақсартуға нақты үлес қосады.
