Түркістан облысы қоғамдық даму басқармасы “Жастар ресурстық орталығы” КММ-нің ұйымдастыруымен Түркістан облысы, Созақ ауданындағы «Жұмбақ тас» этно-лагерінде өтіп жатқан «JasSAQ» республикалық этно-реалити жобасы аясында арқан тарту сайысы жоғары деңгейде ұйымдастырылды.
Сайыстың мақсаты – ұлттық ойындар арқылы жастардың ұйымшылдығы мен командалық рухын арттыру, күш-қайрат пен жеңіске деген жігерді шыңдау.
Сайысқа еліміздің түкпір-түкпірінен келген жастар 6 командаға бөлініп қатысты. Арқан тарту – нағыз төзімділік, өзара үйлесім және тактикалық шеберлікті қажет ететін ұлттық ойын түрі. Әр команда жеңіске жету үшін бар күшін жұмылдырды.
Белгіленген арнайы алаңда ұйымдастырылған бұл сайыс өте тартысты өтті. Қатысушылардың қауіпсіздігі мен сайыстың әділ өтуін тәжірибелі төрешілер бақылап отырды. Әр жұптық кездесу 3 айналымнан тұрды, нәтижесі нақты ұпаймен есептелді.
Сайыс барысында жастардың бойындағы бірлік, төзімділік, шыдамдылық пен сенім айқын байқалды. Командалар бірін-бірі жігерлендіріп, ұжымдық күшпен жеңіске жетуге талпынды. Бұл – тек жарыс емес, ұлттық құндылықтарға негізделген тәрбиелік шара болды.
Сайыс нәтижелері төрешілер алқасының шешімімен хаттамаға тіркеліп, жалпы командалық ұпайға қосылды. Жобаның соңында жоғары нәтиже көрсеткен командалар марапатталады. Барлық қатысушыларға мадақтамалар мен естелік сыйлықтар табысталмақ.
