Түркістан облысы қоғамдық даму басқармасы “Жастар ресурстық орталығы” КММ-нің ұйымдастыруымен Түркістан облысы, Созақ ауданындағы «Жұмбақ тас» этно-лагерінде өтіп жатқан «JasSAQ» республикалық этно-реалити жобасы аясында қыздар арасында күбі пісу сайысы өтті.
Сайыстың мақсаты – ұлттық салт-дәстүрлерді жаңғырту, тұрмыстық мұраны дәріптеу арқылы жастардың еңбекқорлық, ептілік және төзімділік қасиеттерін дамыту.
Сайысқа қыздар 6 команда құрамында қатысты. Қатысушылар арнайы дайындалған ағаш күбі мен піспек арқылы айран пісу үдерісін орындады.
Жарыс барысында қыздардың шапшаңдығы, үйлесімді қозғалысы және еңбекке деген жауапкершілігі бағаланды. Белгіленген уақыт ішінде піскен өнімнің сапасы мен пісу әдісінің дұрыстығына ерекше назар аударылды.
Сайыстың әділқазылары ретінде арнайы шақырылған ауылдық ақ жаулықты әжелер төрелік етті. Олар ұлттық дәстүрге негізделген пісіру тәсілдерін бағалап, өз тәжірибелерімен бөлісті. Бұл қатысушыларға ерекше рух пен шабыт сыйлады.
Сайыс соңында қатысушылардың бірі өз әсерімен бөлісті: «Бұрын күбі пісуді тек кітаптан немесе теледидардан көретінбіз. Бүгін соны өз қолымызбен жасап, әжелерімізден тіке бағасын алу – ерекше әсер сыйлады. Бұл тек сайыс емес, тәрбие болды», – деді қатысушы қыздардың бірі.
Сайыс нәтижелері әділқазылар шешімімен хаттамаға енгізіліп, жалпы командалық ұпайға қосылды. Жобаның қорытынды сәтінде үздік қатысушылар марапатталады.
