Түркістан облысы қоғамдық даму басқармасы “Жастар ресурстық орталығы” КММ-нің ұйымдастыруымен «№28 мектеп-лицейі» КММ-де жастар арасында әлімжеттіктің алдын алу және оған қарсы күресуге бағытталған “Stop bullying” атты кездесу өтті.
Шараның мақсаты – жастарға әлімжеттіктің салдары мен оның алдын алу жолдарын түсіндіру, суицидтік сезімдердің алдын алу, сондай-ақ бос уақытты тиімді өткізу дағдыларын қалыптастыру.
Іс-шараға облыстық жастар орталығы «Қоғамдық даму және психологиялық көмек көрсету» бөлімінің психологі Дүйсенбай Жадыра, Түркістан қаласы полиция басқармасы жергілікті полиция қызметі бөлімі ювеналды полиция тобының учаскелік инспекторы полиция капитаны Айбат Болатқызы психологиялық және құқықтық салдары туралы ақпарат берді. Олар өз тәжірибелерімен бөлісіп, жастарға сенімді қарым-қатынас орнату, өзін-өзі қорғау және қиын жағдайларда дұрыс әрекет ету бойынша кеңестер ұсынды.
Кездесу соңында “Буллингке жол жоқ!” тақырыбында тренинг өтіп, жастарға қарым-қатынас пен өзін-өзі қорғау дағдылары үйретілді.
Буллинг пен суицидтың бір-біріне әсері қандай? Буллинг, яғни жүйелі түрде қудалау мен қорқыту, балалар мен жасөспірімдер арасында суицидтік мінез-құлықтың дамуына әсер етеді. Буллинг пен суицидтің өзара байланысы өте маңызды мәселе болып табылады. Қорлау, физикалық немесе ауызша зорлық көрсету құрбандарында психологиялық және эмоционалдық зардаптарға, мысалы, үмітсіздік, депрессия, өзін-өзі төмен бағалау сияқты сезімдерге алып келуі мүмкін. Мамандар буллингке ұшыраған балалардың көбінесе әлеуметтік оқшаулану мен қабылданбау сезімдерінен зардап шегетінін айтады. Бұл жағдайлар оларды психологиялық күйзеліске, алаңдаушылыққа және суицидтік ойларға итермелейтін факторлар болып табылады. Осылайша, буллинг пен суицидтік мінез-құлық арасындағы өзара байланыс терең, және бұл мәселені шешу қажет.
Бұл іс-шара жастар арасында түсіністік пен сыйластықты арттырып, әлімжеттіктің алдын алуға көмектеседі.
