Бүгінде интернет алаяқтықтың ауқымы кеңейіп, әр түрлі интернет ресурстары мен әлеуметтік желілерді пайдалана отырып, алаяқтардың арбауына түскен алданушылар саны күн санап өсуде. Түркістан облысы көлемінде интернет-алаяқтық қылмыстарының артуы, тұрғындардың бұл алаяқтық қылмысының құрбаны болмаудың алдын-алу мақсатында Ордабасы аудандық полиция бөлімінің ұйымдастыруымен ауқымы кең форум өтті.
Форумға спикер ретінде Түркістан облысы ПД Киберқылмысқа қарсы іс-қимыл басқармасының жедел уәкілі Таңат Серікбаев, Экономикалық тергеп-тексеру департаментінің аға жедел уәкілі Мұхаммедәлі Нысанбек, экономикалық тергеп-тексеру департаментінің Ұйымдастыру-бақылау басқармасының бас маманы Мырзабай Ермахан,“IT STEP ACADEMY” аумақтық директоры Сейдулла Кеңесбайұлы, “Азаматтарға арналған үкімет корпорациясы” IT маманы Арман Амирбек қатысты.
Форум жұмысы жастардың қаржылық сауаттылығын арттыруға, қаржы пирамидалары мен интернет-алаяқтық жағдайларының алдын алуға, сондай-ақ жастардың, мемлекеттік органдардың және банк секторының интернет-алаяқтыққа қарсы күрестегі күш-жігерін шоғырландыруға бағытталған.
Іс-шарада спикерлер интернет-гигиена мәселелері, алаяқтықтың заманауи сын-қатерлері мен қауіптері, сондай-ақ оларға қарсы іс-қимыл әдістерін түсіндірді. Қаржы пирамидалары мен интернет-қылмыстар бойынша нақты кейстер таныстырылды.
