Кентау қаласы №7 колледжінде ҚПБ-нің, ЮПТ КТІЖ-гі инспекторы, полиция майоры М.Аяшов білім алушылармен интернет алаяқтық туралы жиын өткізіп, баяндама оқыды.
Интернет-алаяқтық бойынша аудан көлемінде орын алған фактілеріне тоқталып, оның жиі кездесетін түрлерімен таныстырды.
Интернет – алысты жақындатып, өмірімізді жеңілдетіп отырған құрал. Дегенмен, оның да кемшін тұстары жоқ емес. Алаяқтар үшін интернет қарапайым адамдарды алдаудың жаңа құралына айналып үлгерді.
Интернет жеке деректерді ұрлау және қаржылық алаяқтық жасаудың ең танымал құралдардың біріне айналды. Интернет-алаяқтық заманауи технологиялық құралдарды қолдану арқылы жүзеге асырылады. Оны киберқылмыстың бір түрі деп есептеуге болады.
Киберқылмысқа, оның ішінде телефон және интернет – алаяқтыққа қарсы іс-қимылының 2023-2025 жылдарға арналған бағдарламасын іске асыру мақсатында колледж студенттеріне профилактикалық жұмыстар жүргізіліп, бейнероликтер көрсетіліп, түсіндіру жұмыстары жүргізілді.
Интернеттегі алаяқтық түрлеріне фишинг, картамен алаяқтық, кибер бопсалау және т.б. жатады. Алаяқтар жалған электрондық пошталарды, веб-сайттарды және әлеуметтік желілерді қолданатын қаржылық ұйымдар мен жеке тұлғалар ретінде немесе арнайы құқық қорғау органының қызметкері ретінде өзін таныстырып, қажетті мағлұматтарға қол жеткізетінін айтып өтті. Қазақстанда қаржылық алаяқтық пен киберқылмыспен байланысты көптеп интернет-алаяқтық фактілері тіркеліп жатыр. Дегенмен, көптеген алаяқтық жағдайлары тиісті орындарға хабарланбайды, сондықтан нақты сандары белгісіз. Өзіңізді онлайн алаяқтықтан қорғау үшін жеке ақпаратты беру кезінде абай болу, күдікті электрондық пошталар мен сілтемелерді ашпау, сенімді антивирустық бағдарламалық құралды пайдалану және қаржылық транзакцияларыңызды жүйелі түрде тексеру маңызды.
Сондықтан да интернет-алаяқтық туралы сауаттылық және алаяқтық туралы хабардар болу да онлайн алаяқтардан қорғауда маңызды рөл атқаратынын еске салды.
