Мемлекет басшысының «Әділетті Қазақстанның экономикалық бағдары» атты Қазақстан халқына Жолдауында айтылған тапсырмасын іске асыру шеңберінде «Қарызсыз қоғам» білім беру жобасының ауқымын кеңейту бойынша Бәйдібек ауданында 13-мамырдан бастап оқыту курсы басталған болатын. «Ұлы Дала» РҚБ қаржы сарапшысы Мұратжан Есенбаев Қарызсыз қоғам жобасы бойынша 13-17 мамыр күндері Ағыбеттік тұрғындарға оқыту курсын өткізді.
Бүгін аудан әкімінің орынбасары Бақыт Қырғызалиев, «Аманат» партиясы аудандық филиалының төрағасы Ақбала Құлымбет, «Ұлы Дала» РҚБ қаржы сарапшысы Мұратжан Есенбаев аталған курсқа қатысып білім алған Ағыбеттік 83 азаматқа сертификат табыс етті.
Курсқа қатысқан тұрғындар тарапынан оқу барысында қажетті қаржылық сауаттылықты арттыру бойынша ақпараттармен бөліскен лекторға және ұйымдастырушыларға алғыстарын білдірді.
Жалпы «Қарызсыз қоғам» жобасының мақсаты — азаматтарға қаржылық және құқықтық білікті көмек көрсету, халықтың қаржылық сауаттылығын арттыру, азаматтарға банктік қарыздар мен микрокредиттер бойынша проблемалық берешекті реттеуге жәрдемдесу болып табылады.
«Қарызсыз қоғам» жобасы аясында қаржылық сауаттылықты арттыруға ниет білдіргендердің барлығын оқуға шақыруда. Келесі апта 20 мамыр күні «Қарызсыз қоғам» жобасы Боралдай ауылдық округінің орталығында өткізу жоспарлануда. Оқу бес күн өтеді. Осы уақыт ішінде Сіз қаржылық тәуелсіздік дағдыларын, отбасылық бюджет аудитін үйренесіз, шығындарыңызды басқарасыз, қаржылық жоспарлауды үйренесіз, өзіңізге тиімді шарттармен кредит таңдайсыз, депозиттердің әртүрлі шарттарымен танысасыз.
«Қарызсыз Қоғам» 5 күндік курсына оқу үшін «Amanat» партиясының жергілікті филиалына немесе жергілікті әкімшікке хабарласып, тіркелуге болады. Оқыту тегін өтеді.
