Созақ ауданы әкімдігі ғимаратының үлкен мәжіліс залында Түркістан облысының ауыл шаруашылығы басқармасы басшысының орынбасары Ербұлан Әуелбекұлы және қаржылай қолдау ұйымдары өкілдерінің қатысуымен жиын өтті, деп хабарлайды аудан әкімінің баспасөз қызметіне сілтеме жасаған 4tagan.kz ақпараттық агенттігі.
Жиынды аудан әкімінің орынбасары Ақәділ Сатыбалды ашып, жүргізіп отырды.
Аталған шарада арнайы келген жұмысшы топ шаруаларға көктемгі дала жұмыстарына қажетті несиелер, аудан кәсіпкерлерін және кәсіпкерлік бастамасы бар халықты қаржылай қолдау, мемлекеттік бағдарламалар аясында жеңілдетілген несиелер және қайтарымсыз гранттар бойынша қажетті ақпараттармен бөлісіп, халқтың табысын арттыруға бағытталған мемлекеттік жеңілдетілген несиелердің алу жолдарын түсіндірді. Түсіндіру топ өкілдеріне жиынға қатысушы тұрғындар түрлі жоба мен бағдарламалар бойынша тиісті сауалдарын қойып, нақты жауаптарын алды.
Жиынды қорытындылаған аудан әкімінің орынбасары Ақәділ Сатыбалды күн тәртібінде қаралған мәселелердің өзектілігіне айрықша тоқталды. Туындаған мәселелерді бірлесе шешіп, ниет білдіруші жергілікті тұрғындарға қолдау көрсетілетінін де тілге тиек етті. Жобаны іске асыру кезінде салаға жауапты мамандар мен ауылдық округ әкімдері тығыз байланыста болып, тиісті жұмыстардың жүйелі жүргізуді ескертті.
Жиын соңында қаржылай қолдау ұйымдарынан келген жауаптылар тұрғындарды жеке мәселелерімен де қабылдады. Одан соң, Жартытөбе ауылдық округіне барды. Онда «Ауыл аманаты» бағдарламасы бойынша 2,5 пайыздық жеңілдетілген несие алып, термопанель өндірісін жолға қойған ауыл тұрғыны Майусов Құрманбектің жұмысымен танысты.
